Cho‘ntakka zarba: Go‘sht narxi “uchib ketdi” – O‘zbekistonda mart oyida 9,1% oshdi!

O‘zbekistonda mart oyida go‘sht narxi 9,1 foizgacha oshgan.

Statistika qo‘mitasi inflyasiya hisobotida ma’lum qilishicha, 2025 yilning mart oyida O‘zbekistonda inflyasiya darajasi 0,9 foizni tashkil etdi.

Bu ko‘rsatkich, o‘tgan yil mart oyidagi ko‘rsatkichdan 0,67 foiz yuqori, ammo 2022 yil (1,53 foiz) va 2023 yilning (1,01 foiz) mos davridagi inflyasiya ko‘rsatkichlaridan past.

Yillik inflyasiya 2024 yilning mart oyiga nisbatan 10,3 foizgacha tezlashdi. Fevral oyida 10,13 foiz edi.

Mart oyida oziq-ovqat mahsulotlari narxlari 1,5 foizga (yillik hisobda 3,6 foizga), nooziq-ovqat mahsulotlari narxi 0,2 foizga (7,4 foiz), pullik xizmatlar narxi 0,7 foizga (27,1 foiz) oshdi.

Mart oyida narxlarning asosiy o‘sishi quyidagi oziq-ovqat mahsulotlarida kuzatildi: mol go‘shti – 8,3-8,8 foiz (yillik hisobda 18,5 foiz), qo‘y go‘shti – 9,1 foiz (19,4 foiz), qiyma – 5,4 foizga oshdi. Solishtirish uchun: yanvar-fevral oylarida mol go‘shti 1,1 va 2,8 foizga, qo‘y go‘shti 1,2 va 2,4 foizga qimmatlagandi.

Buning fonida tovuq go‘shti narxi 0,1−0,6 foizga, tirik baliqniki 1,7 foizga oshdi. Boshqa asosiy oziq-ovqat mahsulotlaridan sariyog‘ 1,1 foizga, sut 0,9 foizga, alkogolsiz ichimliklar 0,5 foizga qimmatladi.

Narxlar pasayishi guruch va guruch oqshog‘i (-2,3 foiz), shuningdek, bug‘doy unida (-1,4 foiz) kuzatildi.

Meva-sabzavot mahsulotlari narxlari dinamikasi mavsumiy omil asosida shakllandi. Oy davomida meva va yong‘oqlar narxi sezilmas darajada oshdi (o‘rtacha 0,1 foizga).

Sabzavotlar, ildizmevalar va dukkaklilar narxi o‘rtacha 0,3 foizga qimmatladi, jumladan, sabzi narxi 15,7 foizga, pomidorniki 4,3 foizga, bulg‘or qalampiriniki 3,8 foizga, karam va sarimsoqniki 2,6 foizga, piyozniki 1,9 foizga oshdi.

Narxlarning pasayishi bodring (-14,7 foiz), kartoshka (-3,7 foiz), tuzlangan va marinadlangan sabzavotlar, tomat pastasida (0,1−0,7 foiz oralig‘ida) kuzatildi.

Qo‘mita xabarida, negadir elektr energiyasi, gaz, metan, propan, benzin va boshqa ko‘plab tovarlar bo‘yicha inflyasiya haqida ma’lumotlar keltirilmagan.

Mart oyidan boshlab Surxondaryo viloyatida maishiy chiqindilarni olib chiqib ketish uchun to‘lov narxi, Toshkent shahri va Sirdaryo viloyatida esa ko‘p qavatli uylarda texnik xizmat ko‘rsatish to‘lovi narxi oshirildi. Respublika bo‘yicha o‘rtacha hisobda ushbu xizmatlar uchun tariflarning oshishi 4 foizni tashkil etdi. Turar joy binolarini saqlash va ta’mirlash uchun materiallar narxi o‘rtacha 0,2 foizga pasaydi.

Mart oyida aviachiptalar fevral oyidagi 22,4 foizlik oshishdan keyin o‘rtacha 4,4 foizga (ichki qatnovlar 3,9 foizga, xalqaro reyslar 4,8 foizga) qimmatladi.

Kuzatilayotgan operatorlar orasida mobil aloqa xizmatlari narxlari o‘rtacha 3,5 foizga oshdi.

Qo‘mitaning inflyasiya hisoboti shakli va mazmuniga o‘zgartirishlar kiritildi. Yillik ko‘rsatkichda eng yuqori inflyasiya darajasi Toshkent shahri (12 foiz), Surxondaryo (11,2 foiz) va Buxoro (10,7 foiz) viloyatlarida, oylik hisobda esa Surxondaryo (1,2 foiz) va Jizzax (1 foiz) viloyatlarida qayd etildi.