Braziliyada 36 yoshli futbolchi otib o‘ldirildi

Braziliyada 36 yoshli futbolchi Bismark Vinisius Freyre du Nasimentu otishma oqibatida halok bo‘ldi.

Bismark yoki «B10» taxallusi bilan tanilgan futbolchi Natal shahridagi barlardan birida o‘qotar quroldan jarohat olgan. U shifoxonaga yetkazilgan, biroq hayotini saqlab qolishning imkoni bo‘lmagan. Hodisada yana bir kishi jarohatlangan va tirik qolgan.

Mahalliy OAV va Riu-Grandi-du-Norti shtati polisiyasining dastlabki ma’lumotlariga ko‘ra, voqea payshanbadan jumaga o‘tar kechasi sodir bo‘lgan. Bismark do‘stlari bilan barga borgan va u yerda boshqa bir erkak bilan tortishib qolgani aytilmoqda. Janjal keyinchalik otishmaga aylangan.

Huquq-tartibot idoralari hodisa sabablarini aniqlash uchun tergov olib bormoqda.

Marhum futbolchining uch nafar farzandi qoldi. U 2027 yilda «Olimpiya» klubiga o‘tishni rejalashtirgan edi.