Bolalarga xorijga chiqish pasportini rasmiylashtirish uchun rozilikni onlayn berish mumkin bo‘ladi

2026 yil 1 avgustdan migrasiya va personallashtirish sohasida boshqa shaxsning roziligi talab etiladigan davlat xizmatlari uchun E-Rozilik platformasini ishga tushirish rejalashtirilmoqda.

Loyihaga ko‘ra, jismoniy va yuridik shaxslar platforma orqali bir martalik elektron rozilikni quyidagi xizmatlar uchun rasmiylashtirishi mumkin bo‘ladi:
voyaga yetmaganlarga xorijga chiqish biometrik pasportini rasmiylashtirish uchun ota-ona yoki vasiy (homiy) roziligini berish;
15–18 yoshli voyaga yetmaganlarning mustaqil ravishda chet elga chiqishiga rozilik berish;
16 yoshga to‘lmagan bolalarga ID-karta rasmiylashtirish uchun ota-ona yoki qonuniy vakil roziligini berish;
fuqarolikdan chiqishda ota-ona va turmush o‘rtog‘ining roziligini rasmiylashtirish;
yashash yoki turgan joy bo‘yicha ro‘yxatga qo‘yish va ro‘yxatdan chiqarishda uy-joy egasi yoki manfaatdor shaxslarning roziligini olish;
uy-joyda ro‘yxatda turgan shaxslar haqidagi ma’lumotnoma (17-shakl)ni olish uchun uy egasining roziligini rasmiylashtirish.

Elektron rozilikni Passport-visa mobil ilovasi orqali rasmiylashtirish uchun BHMning 50 foizi (206 ming so‘m), migrasiya bo‘limiga shaxsan murojaat qilinganda esa BHMning 30 foizi (123 ming 600 so‘m) miqdorida yig‘im undirilishi taklif etilmoqda.