Rossiya Mudofaa vazirligi 20 iyun kuni Rossiya harbiy xizmatchilarining Ukraina hududidan qaytarilgani haqida ma’lum qildi. Vazirlik xabariga ko‘ra, almashinuv 2 iyun kuni Istanbulda erishilgan kelishuvlar asosida amalga oshirilgan. Unga javoban Kiyevga ukrainalik asirlar guruhi topshirilgan.
Ukraina Prezidenti Vladimir Zelenskiy ham almashinuvni tasdiqladi. Uning so‘zlariga ko‘ra, ozod qilinganlar ikki yildan ortiq vaqt davomida asirlikda bo‘lishgan.
«Bu — Mariupol, Donetsk, Lugansk, Zaporojye, Xerson, Xarkov va Chernigov hududlarining himoyachilari. Qurolli kuchlar, Milliy gvardiya, Chegara xizmati jangchilari», — dedi Zelenskiy.
Har ikki tomondan ozod qilinganlar soni aniq ko‘rsatilmagan. RBK manbasiga ko‘ra, almashinuv teng asosda amalga oshirilgan. Shu kuni, 20 iyunda, yaralangan harbiylarning sanitar almashinuvi ham davom etgan.
Iyun oyi boshlarida Istanbulda Rossiya va Ukraina vakillari og‘ir yaralanganlar, 18 yoshdan 25 yoshgacha bo‘lgan asirlar, shuningdek, halok bo‘lgan harbiylarning jasadlari almashinuvi bo‘yicha kelishib olishgan. Repatriasiya 11–16 iyun kunlari amalga oshirilgan. Ukraina ma’lumotlariga ko‘ra, unga 6057 nafar halok bo‘lgan harbiyning jasadi topshirilgan, Rossiya esa 78 nafarni qabul qilganini bildirgan.
9 iyun kuni 25 yoshgacha bo‘lgan asirlar almashinuvi bo‘lib o‘tgan. 10 va 12 iyun kunlari og‘ir yaralanganlar hamda boshqa jangchilar almashinuvi amalga oshirilgan. Iyun o‘rtalarida hech qanday shartlarsiz yaralanganlarni qaytarishni nazarda tutuvchi sanitar almashinuvlar boshlangan.
Almashinuvning so‘nggi bosqichi 19 iyun kuni bo‘lib o‘tgan. Avvalgi holatlarda bo‘lgani kabi, qaytarilgan harbiylar soni rasman oshkor qilinmagan.
Icroil «Qizil to‘y» operasiyasi doirasida 12 daqiqa ichida Eronning harbiy rahbarlarini yo‘q qildi
Isroil mojarosiga aralashgan uchinchi davlat Eron tomonidan zudlik bilan jazolanadi
"Eron bu urushda yolg‘iz emas..."
