Armaniston Rossiya bilan uzilishni istamaydi

Armaniston Yevropa Ittifoqi bilan yaqinlashish yo‘nalishiga qaramay, Rossiya bilan munosabatlarni yomonlashtirish yoki uzishni rejalashtirmayapti. Bu haqda Nikol Pashinyan brifingda ma’lum qildi.

" Bu biz o‘z tashqi siyosatimizni bir yo‘nalish foydasiga qurmaymiz, balki muvozanatni topishga intilamiz, degani. Bu siyosatning ko‘rinishlaridan biri Yevropa Ittifoqiga kirish jarayoni boshlanishi to‘g‘risidagi qonun bo‘lib, biz buni demokratik islohotlarni amalga oshirish uchun qo‘shimcha rag‘bat sifatida ko‘rmoqdamiz ", — dedi bosh vazir.

Pashinyanga ko‘ra, Armaniston-Rossiya munosabatlari o‘zaro manfaatlar asosida qurilgan va Yerevan muvozanatli va adolatli tashqi siyosatga amal qiladi.

Shu bilan birga, Armaniston hukumati rahbari barcha xalqaro hamkorlar, jumladan, mintaqaviy qo‘shnilar – Ozarbayjon va Turkiya bilan yaxshi munosabatlarni rivojlantirish istagini bildirdi.

Pashinyan Armanistonning Yevropa Ittifoqi bilan munosabatlarini chuqurlashtirish niyatini alohida ta’kidladi. U Yevropa Ittifoqiga Armanistonda kuzatuvchilar missiyasini joylashtirish qarori uchun minnatdorchilik bildirdi va viza rejimini tezroq liberallashtirishga umid bildirdi.

Eslatib o‘tamiz, aprel oyi boshida Armaniston prezidenti parlament tomonidan ma’qullangan Yevropa Ittifoqiga kirish to‘g‘risidagi qonunni imzolagan bo‘lib, bu qonun tashqi ishlar vaziri o‘rinbosari Paruyr Ovannisyanning so‘zlariga ko‘ra, “Armaniston fuqarolarining YEI bilan hamkorlikni yangi bosqichga ko‘tarish istagini aks ettiradi”, ammo a’zolik uchun ariza emas.

Shu bilan birga, Rossiya Bosh vaziri o‘rinbosari Aleksey Overchuk Armaniston YEOII va YEI o‘rtasida tanlov qilishiga to‘g‘ri kelishini va “ikki stulda ham o‘tirish mumkin emasligini” aytdi.

Eslatib o‘tamiz, avvalroq Armaniston 2024-yilda KXSHTni moliyalashtirishni nazarda tutuvchi hujjatni imzolashdan va ushbu tashkilot faoliyatini moliyalashtirishda ishtirok etishdan bosh tortgan edi.