AQShda uch nafar shaxs Britaniya harbiy-havo kuchlari bazasida terakt tayyorlashda ayblandi

AQSh Adliya vazirligi Eron va Iroq fuqaroligini olgan uch nafar shaxsga Yevropa va AQShda, jumladan, amerikalik harbiylar joylashgan Buyuk Britaniyaning Ferford aviabazasida teraktlar tayyorlashga aloqadorlik bo‘yicha ayblov qo‘ydi.

Ayblovlar Eron va Iroq fuqaroligiga ega Muhammad Baker Saad Daud as-Saadiy, Eron fuqarosi Mohsen Muhojiriy hamda Iroq fuqarosi Muhammad Ali al-Hasaniyga nisbatan ilgari surilgan.

Amerika tergovi versiyasiga ko‘ra, ayblanuvchilar Eron tarafdori bo‘lgan «Kataib Hizbulloh» guruhi va Islom inqilobi qo‘riqchilari korpusi (IIQK) manfaatlari yo‘lida harakat qilgan. Ular Yevropa va AQShdagi qariyb 20 ta hujum va ularni amalga oshirishga urinishlarda ishtirok etganlikda gumonlanmoqda.

Jumladan, tergovchilarning fikricha, gumonlanuvchilar 2026 yil sentyabr oyida Buyuk Britaniya Qirollik harbiy-havo kuchlarining Ferford aviabazasida terakt tayyorlashni tashkil etgan. Ushbu bazada Amerika harbiy samolyotlari va harbiy xizmatchilari joylashgan bo‘lgan.

Ish materiallariga ko‘ra, ehtimoliy hujumni bevosita muvofiqlashtirish bilan al-Hasaniy shug‘ullangan. U Muhojiriy bilan birga Eronda bo‘lgan holda, hujumga tayyorgarlik ko‘rayotgan Buyuk Britaniyadagi sheriklari bilan aloqada bo‘lgan.

Tergov ma’lumotlariga ko‘ra, avgust va sentyabr oylarida fitna ishtirokchilari aviabaza hududini kuzatgan, transport vositalari, yoqilg‘i va portlovchi qurilmalar tayyorlashda ishlatilishi mumkin bo‘lgan materiallarni xarid qilgan.

Sentyabr oyi oxirida Britaniya huquqni muhofaza qiluvchi organlari hujum uchun mo‘ljallangan bo‘lishi mumkin bo‘lgan uchta mikroavtobusni aniqlagan va ular ichida bo‘lgan shaxslarni qo‘lga olgan.

Shu bilan birga, o‘sha vaqtda terrorizmga oid boshqa ish bo‘yicha Nyu-Yorkda hibsda saqlanayotgan as-Saadiy ham sheriklarining harakatlarini muvofiqlashtirishda davom etgan bo‘lishi mumkin. U qarindoshlari orqali shifrlangan xabarlarni yetkazib turgani taxmin qilinmoqda.

Amerika rasmiylari, shuningdek, ayblanuvchilarni Yevropaning bir qator mamlakatlaridagi yahudiy jamoalariga qarshi amalga oshirilgan hujumlar bilan ham bog‘lamoqda. Bu hujumlarda o‘t qo‘yish vositalari va portlovchi moddalardan foydalanilgan.

Uchala shaxsga ham sakkizta band bo‘yicha ayblov qo‘yilgan. Ular orasida terrorchilik tashkilotlarini moddiy qo‘llab-quvvatlash maqsadida til biriktirish, terrorizmni moliyalashtirish va portlashlar tayyorlash kabi ayblovlar bor.

Agar ularning aybi sudda isbotlansa, ayblanuvchilar umrbod ozodlikdan mahrum etilishi mumkin.

AQSh Adliya vazirligi ta’kidlashicha, ayblovlarning ilgari surilishi gumonlanuvchilarning aybi isbotlanganini anglatmaydi. Sudning yakuniy qarori chiqarilguniga qadar ular aybsiz hisoblanadi.