AQSh va Rossiya siyosiy mahbuslar bo‘yicha kelishuvga erisha oladimi?

The Atlantic nashri AQSh prezidentining maxsus vakili Jon Koulga tayanib xabar berishicha, Donald Tramp ma’muriyati Kreml bilan Rossiyadagi siyosiy mahbuslarni ozod qilish evaziga ayrim sanksiyalarni yumshatish bo‘yicha muzokaralar o‘tkazish imkoniyatini ko‘rib chiqmoqda.

Moskva esa Vashington bilan bunday tashabbus muhokama qilinmaganini bildirdi. Rossiya tomoni mamlakatda «siyosiy mahbuslar yo‘q» degan pozisiyani bildirdi.

📝 2024 yilda Rossiyadagi qamoqxonadan mahbuslar almashinuvi natijasida ozod qilingan siyosatchi Andrey Pivovarov ehtimoliy tashabbusni qo‘llab-quvvatladi. Uning fikricha, agar bunday kelishuv amalga oshsa, gap asosan iqtisodiyotning muhim tarmoqlariga qarshi sanksiyalar emas, balki alohida shaxslarga nisbatan cheklovlar haqida borishi mumkin.

Pivovarovning fikricha, neftga oid sanksiyalar masalasi ko‘tarilmaydi, chunki Rossiya Belarusdan farqli o‘laroq urush olib bormoqda. Biroq u bunday yondashuvda ziddiyat borligini ham ta’kidlaydi: «AQSh ma’muriyati bir qo‘li bilan Ukrainaga qurol yetkazib bersa, ikkinchi qo‘li bilan Vladimir Putinga urush olib borishni yengillashtiradi».

📝 Jenevadagi Rossiya diplomatik missiyasining sobiq xodimi Boris Bondarev DW nashriga bunday rejalarga shubha bilan qarashini bildirdi. Uning ta’kidlashicha: «Muammo shundaki, ayrim odamlar ozod qilinadi, ammo keyin bo‘shagan kameralarga qancha odam qamaladi?»

Bondarevning fikricha, Kreml mahbuslarni ozod qilish evaziga Rossiya energetika resurslariga taalluqli jiddiy sanksiyalarni yumshatishni talab qilishi mumkin.

📝 Siyosatshunos Aleksandra Filippenko esa bunday tashabbusni «Tramp uslubidagi tashabbus» deb hisoblaydi. U AQSh prezidenti avval ham, masalan, Hurmuz bo‘g‘ozini ochish evaziga Eronga qarshi sanksiyalarni yumshatishni taklif qilganini eslatdi.

Filippenkoning fikricha, ehtimoliy gumanitar kelishuvlar AQSh Kongressida noyabr oyi boshida rejalashtirilgan oraliq saylovlar bilan ham bog‘liq bo‘lishi mumkin. Uning ta’kidlashicha, Trampning Respublika partiyasi Kongressning har ikki palatasida nazoratni yo‘qotishi mumkin bo‘lgan vaziyatda, saylovlar oldidan Oq uy uchun «qator oraliq g‘alabalarni» namoyish etish muhim bo‘lishi mumkin va bunday kelishuv ulardan biriga aylanishi ehtimol.