Ana xolos: Ronaldu yozda “Real”ga qaytadi

“An-Nasr” va Portugaliya terma jamoasi hujumchisi Krishtianu Ronaldu yozda “Real” uchun o‘ynash yo‘lini topdi. Bu haqda Sky Sports nashri xabar tarqatdi.

40 yoshli futbolchining saudiyaliklar bilan amaldagi shartnomasi joriy mavsum oxirida yakuniga yetadi. Ronaldu hamkorlikni uzaytirishi kutilmoqda.

Biroq Krishtianu yangi formatda o‘tkaziladigan klublar o‘rtasidagi jahon chempionatida qatnashishni orzu qilyapti. “An-Nasr” bu turnirga chiqa olmagan. Ronaldu sobiq jamoasi “Real” bilan bo‘lajak musobaqada qatnashishi mumkin.

FIFA klublar o‘rtasidagi jahon chempionati ishtirokchilari uchun maxsus transfer oynasi tashkil qildi. U 1-10 iyun kunlari bo‘ladi. Ronaldu ana shu muddatda “Real” bilan bir musobaqa, ya’ni klublar o‘rtasidagi jahon chempionati uchun bitim tuzishi aytilmoqda.

Avvalroq, jahon chempionatidagi qatnashadigan “Inter Mayami” va “Al-Hilol” ham Ronalduga o‘z tarkibidan joy berishga tayyor ekani haqida ma’lumotlar chiqqan edi.

Ronaldu joriy mavsum klub va terma jamoada jami 40 ta uchrashuvla qatnashib, raqiblar darvozasini 34 marotaba ishg‘ol qildi va jamoadoshlariga beshta golli pas uzatdi.