Prezident matbuot kotibi Samarqandda brifing o‘tkazdi

O‘zbekiston Respublikasi Prezidenti matbuot kotibi Sherzod Asadov bugun Samarqand shahrida o‘z ishini boshlaydigan YUNESKO Bosh konferensiyasi 43-sessiyasi arafasida ommaviy axborot vositalari vakillari uchun brifing o‘tkazdi.

"Bugun Samarqand shahrida o‘z ishini boshlaydigan YUNESKO Bosh konferensiyasi 43-sessiyasi arafasida ommaviy axborot vositalari vakillari uchun brifing o‘tkazdim.

Eng muhim ma’lumotlar:

- Bu tarixiy voqea so‘nggi 40 yil ichida ilk bor Parijdagi bosh qarorgohdan tashqarida va birinchi marta Markaziy Osiyoda o‘tkazilmoqda, YUNESKO tashkil etilganining 80 yilligi bilan bir vaqtda o‘tmoqda;

- 43-sessiya mintaqa tarixidagi eng yirik xalqaro forumlardan biri bo‘ladi. Unda 190 ta a’zo davlat va xalqaro tashkilotlardan 2 ming 800 dan ortiq vakil, shu jumladan 70 ga yaqin yuqori darajali shaxslar ishtirok etadi;

- tantanali ochilish marosimida faxriy mehmonlar sifatida tashrif bilan mamlakatimizda bo‘lib turgan Serbiya Respublikasi Prezidenti Aleksandr Vuchich va Slovakiya Respublikasi Prezidenti Peter Pellegrini ham qatnashadi;

- Samarqand sessiyasi doirasida 150 dan ortiq turli tadbirlar, shu jumladan O‘zbekiston tashabbusi bilan 20 dan ziyod qo‘shimcha tadbirlar tashkil etiladi;

- tantanali ochilish marosimida Prezidentimiz Shavkat Mirziyoyev ishtirok etib, nutq so‘zlaydi. Davlatimiz rahbarining nutqida bir qator muhim tashabbuslar ilgari surilishi kutilmoqda;

- tadbir doirasida Prezidentimiz Slovakiya Prezidenti Peter Pellegrini va YUNESKO Bosh direktori Odri Azule bilan ikki tomonlama uchrashuvlar o‘tkazadi;

- YUNESKO Bosh konferensiyasining 43-sessiyasi dunyo va mamlakatimizning yetakchi ommaviy axborot vositalari, jami 500 dan ziyod jurnalist tomonidan yoritiladi. Samarqandda ularning samarali faoliyati uchun barcha sharoitlar yaratilgan" - deyiladi Sherzod Asadovning ijtimoiy tarmoqlardagi postida.