Rossiya aktivlari qurol-yaroq va Kiyevga harbiy yordam uchun sarflanmoqda

Buyuk Britaniya Rossiyaning muzlatilgan aktivlaridan 10 milliard funt sterlingni Ukrainaga harbiy yordam sifatida sarfladi, dedi mudofaa vaziri Jon Xili Kiyevga safari vaqtida.

Buyuk Britaniya ilk bor Rossiyaning muzlatilgan aktivlari hisobiga Ukrainaga harbiy yordam moliyalashtirdi. Mudofaa vaziri Jon Xili 2025 yil 4 sentyabrda Kiyevga qilgan tashrifi vaqtida shu haqda ma’lum qildi: bu maqsadlarga taxminan 1 milliard funt sterling (taqriban 1,2 milliard yevro) ajratilgan.

Buyuk Britaniya hukumati ma’lumotlariga ko‘ra, ushbu mablag‘lar orqali yuz minglab artilleriya o‘q-dorilari, ZRK raketalari, dronlar, ehtiyot qismlar yetkazib berildi, shuningdek texnikani ta’mirlash va xizmat ko‘rsatish bo‘yicha yangi shartnomalar tuzildi. 2025 yilda Buyuk Britaniyaning Ukrainaga ko‘rsatgan umumiy yordam mablag‘i 4,5 milliard funt sterlingga (taqriban 5,3 milliard yevro) yetdi.

Bundan tashqari, London Kiyevga 2,26 milliard funtlik kredit taqdim etdi, u muzlatilgan Rossiya aktivlaridan olingan daromad hisobidan to‘lanmoqda.

Javoban, Rossiya Xavfsizlik Kengashi Raisining o‘rinbosari Dmitriy Medvedev britan rasmiylarini «o‘g‘irlar» deb atadi.
«Mazkur pulni sud orqali talab qilish mumkin emas. O‘g‘irlanganini tabiiy shaklda qaytarib olamiz — ya’ni ukrain yerlari va u yerdagi mulk bilan», — deb yozdi u telegram kanalida.

2022 yilda Ukrainada urush boshlanganidan so‘ng G‘arb davlatlari Rossiya Markaziy bankining 260 milliard yevro aktivlarini muzlatdi. Shularning 190 milliard yevro qiymatdagisi Belgiyadagi Euroclear depozitarida saqlanmoqda. Yevropa Ittifoqi aktivlarni to‘g‘ridan-to‘g‘ri musodara qilishdan voz kechdi, ammo daromadni Kiyevni qo‘llab-quvvatlash uchun ishlatishga rozilik bildirdi.

2025 yil yanvarda Buyuk Britaniya va Ukraina siyosiy hamkorlik, erkin savdo va strategik sheriklik bo‘yicha 100 yillik shartnomani imzoladi. Hujjat mamlakatlar o‘rtasida mudofaa hamkorligini chuqurlashtirishni nazarda tutadi.