Tramp: Rossiya va Ukraina hali tinchlikka tayyor emas

AQSh prezidenti Donald Tramp Rossiya va Ukraina o‘rtasidagi ehtimoliy tinchlik kelishuviga nisbatan “ham realistik, ham optimistik” ekanini aytdi, biroq taraflar hali bunday qadamga tayyor emasligini ta’kidladi. Bu haqda u CBS News telekanaliga telefon orqali bergan intervyusida ma’lum qildi.

Trampning so‘zlariga ko‘ra, u jarayonni yaqindan kuzatmoqda va ikki davlat rahbarlari – Rossiya prezidenti Vladimir Putin hamda Ukraina prezidenti Vladimir Zelenskiy bilan muntazam muloqot olib bormoqda:

“Men kuzatyapman, ko‘rib turibman, bu haqda Putin va Zelenskiy bilan gaplashyapman. Nimadir sodir bo‘ladi, lekin ular hali tayyor emas. Lekin shunday bo‘ladi. Biz u yerga yetamiz”, dedi AQSh rahbari.

Uning ta’kidlashicha, uning diplomatik yondashuvi – “rahbarlarni muzokara stoliga olib kelish va shaxsan o‘z rahbarligi ostida tinchlik bitimiga vositachilik qilish”dan iborat. Shu bilan birga, Tramp tezkor yechim topish uchun sabr-toqat zarurligini aytdi va bu yil boshqa tinchlik tashabbuslari orqali muayyan samaraga erishilganini eslatdi.

Shuningdek, AQSh prezidenti o‘zini Tinchlik bo‘yicha Nobel mukofotiga nomzod emasligini qo‘shimcha qildi:
“Bu haqda aytadigan gapim yo‘q. Men faqat urushlarni to‘xtata olaman. Men e’tibor izlamayman. Men shunchaki hayotni saqlab qolishni istayman”, dedi Tramp.