AQSh va Yevropa Eron kelishuvining oxirgi muddatini avgust oyi oxiriga belgiladi, aks holda...

AQSH, Buyuk Britaniya, Germaniya va Fransiya Eron bilan yadroviy bitim tuzish uchun oxirgi muddat sifatida avgust oyining oxirini belgilashga kelishib oldilar, aks holda Tehron "qattiq sanksiyalarga duch keladi".

Bu haqda Axios portali uchta manbaga tayanib xabar berdi.

Nashr suhbatdoshlariga ko‘ra, AQSh Davlat kotibi Marko Rubio hamda Fransiya, Germaniya va Buyuk Britaniya tashqi ishlar vazirlari dushanba kuni bo‘lib o‘tgan telefon muloqoti chog‘ida Eron bilan yadroviy kelishuvga erishish uchun so‘nggi muddat sifatida avgust oyining oxirini belgilashga kelishib olgan. Manbalar ta’kidlaganidek, aks holda uch Yevropa davlati 2015 yilgi kelishuvlar bo‘yicha bekor qilingan BMT Xavfsizlik Kengashi sanksiyalarini yangilaydigan mexanizmni ishga tushirishni rejalashtirmoqda.

2015 yilda Eron, Buyuk Britaniya, Germaniya, Xitoy, Rossiya, AQSh va Fransiya Tehronning yadroviy qurol ishlab chiqarayotgani haqidagi G‘arb ayblovlari tufayli 2002 yilda boshlangan inqirozga barham berib, Qo‘shma keng qamrovli harakatlar rejasini (JSPOA) imzoladilar. 2018 yilda AQSh prezidenti Donald Tramp kelishuvdan chiqishini e’lon qildi va AQShning Eronga qarshi barcha sanksiyalarini tikladi. Bunga javoban 2020 yilda Islom Respublikasi JSPOA bo‘yicha o‘z majburiyatlarini qisqartirish va Atom energiyasi bo‘yicha Xalqaro agentlik (MAGATE) inspektorlarining mamlakat yadroviy inshootlariga kirishi cheklanganini e’lon qildi.

Eron va AQSh vakillari 2025 yilning aprelidan mayigacha yadroviy dastur bo‘yicha besh raund maslahatlashuvlar o‘tkazdi. Muzokaralar jarayoni 13 iyun kuni Isroil tomonidan 12 kunlik harbiy operasiya boshlangani va AQShning Eron yadroviy inshootlariga zarbalar bergani sababli muzlatib qo‘yilgan edi. Ayni vaqtda Buyuk Britaniya, Germaniya va Fransiya vakillari Islom Respublikasi bilan muzokaralar olib bordi.