Jarima maydonchasidan avtomobilni chiqarishda elektron ruxsatnoma olish tizimi joriy etilishi mumkin

Elektron ruxsatnoma QR-kod ko‘rinishida rasmiylashtiriladi va vakolatli organlar tomonidan avtomatlashtirilgan tizim orqali tekshiriladi.

Bu borada Vazirlar Mahkamasi qaror loyihasi regulation.adliya.uz portalida jamoatchilik muhokamasiga qo‘yildi.

Loyihaga ko‘ra, avtomototransport vositalarini jarima maydonchasidan olib chiqish uchun endi Davlat yo‘l harakati xavfsizligi xizmatiga an’anaviy qog‘ozbozlik o‘rniga Yagona interaktiv davlat xizmatlari portali (YAIDXP), Davlat xizmatlari markazlari yoki maxsus mobil ilova orqali elektron ruxsatnoma olish imkoniyati yaratiladi.

Yangi tartib fuqarolarning vaqt va mablag‘ini tejashi, ortiqcha ovoragarchilikni kamaytirishi kutilmoqda.

Rejaga ko‘ra,

• 2025 yil 31 iyulga qadar YAIDXP, Davlat xizmatlari markazlari yoki Davlat yo‘l harakati xavfsizligi xizmatining mobil ilovasi orqali avtomototransport vositalarini jarima maydonchasidan olib chiqish uchun elektron ruxsatnoma olish davlat xizmati yo‘lga qo‘yiladi;
• jismoniy va yuridik shaxslar avtomototransport vositalarini jarima maydonchasidan olib chiqish uchun elektron ruxsatnoma olish yuzasidan DYHXXga an’anaviy (og‘zaki yoki yozma) tarzda murojaat qilishi mumkin.

Qayd etish joizki, elektron ruxsatnoma QR-kod ko‘rinishida rasmiylashtiriladi va vakolatli organlar tomonidan avtomatlashtirilgan tizim orqali tekshiriladi. Bu jarayonda YAIDXP hamda Ichki ishlar vazirligining axborot tizimlari o‘zaro integrasiya qilinadi.

Prezidentning ichki ishlar organlarini raqamli transformasiya qilishga oid qarori ijrosi doirasida tayyorlangan mazkur qaror loyihasi fuqarolar va mutaxassislar tomonidan keng muhokama qilinmoqda.