“Erik” to‘foni Meksikaga yetib keldi

Meksika hukumati, ayniqsa, Akapulko shahri va Puerto-Anxel mintaqasida vayronagarchiliklar yuzaga kelishi mumkinligi haqida ogohlantirdi, deya xabar beradi Anadolu.

Meksikaning janubi-g‘arbiy qismiga yetib kelgan “Erik” to‘foni o‘ta xavfli 4-toifaga yetdi, deb xabar berdi AQSh Milliy to‘fon markazi.

Markaz bayonotida ta’kidlanishicha, bo‘ron Meksikaning janubi-g‘arbiy qismi va unga tutash hududlarga kuchli yog‘ingarchilik olib kelishi, bu esa halokatli sel va suv toshqinlariga sabab bo‘lishi mumkin.

Meksika prezidenti Klaudiya Sheynbaum videomurojaatida mintaqadagi barcha tadbirlar to‘xtatilganini ta’kidladi va aholini uyda yoki boshpanalarda qolishga chaqirdi.

"Erik" to‘foni Meksikani qamrab olar ekan, kuchli yomg‘ir Braziliyada ham kundalik hayotga salbiy ta’sir ko‘rsatmoqda.

Rasmiylarga ko‘ra, Riu-Grandi-du-Sul shtatida bo‘ron tufayli 2600 dan ortiq kishi o‘z uylarini tark etishga majbur bo‘lgan.

Shuningdek, elektr ta’minotidagi uzilishlar, ko‘chkilar va ko‘priklarning qulashi ham qayd etilgan. Tabiiy ofat oqibatida ikki kishi halok bo‘lgan, bir kishi bedarak yo‘qolgan.