Зеленский: Украина Россия ва АҚШ билан уч томонлама учрашувга рози

Украина президенти Владимир Зеленский мамлакат Россия ва АҚШ иштирокида уч томонлама учрашув ўтказиш таклифини қўллаб-қувватлаётганини билдирди.

Киевдаги маълумотларга кўра, АҚШ Украина ва Россия иштирокида миллий хавфсизлик бўйича маслаҳатчилар даражасида уч томонлама учрашув ўтказишни таклиф қилган. Мазкур ташаббус урушни тугатишга қаратилган.

Украина ОАВларининг хабар беришича, Зеленский Россия—Украина уруши бўйича журналистлар саволларига онлайн тарзда жавоб берган.

Унинг сўзларига кўра, АҚШ томонидан таклиф этилган тинчлик режаси устида иш давом этмоқда, Украина делегацияси эса АҚШда музокараларни олиб бормоқда.

Зеленский бундай учрашув янги натижа беришига шубҳа билдирган, чунки «шу форматда Туркияда ҳам учрашувлар бўлган». Бироқ у ўшанда асирлар алмашинуви бўйича келишувга эришилганини эслатиб, бундай учрашувларни ҳеч бўлмаганда янги алмашинувлар ёки Россия, АҚШ ва Украина президентлари ўртасидаги эҳтимолий учрашувга замин яратиш учун ўтказиш кераклигини таъкидлаган.

«Бу ҳақда мен бир неча бор айтганман. Айрим мураккаб масалалар борки, уларни давлат раҳбарлари ҳал қилиши керак. Агар натижа сифатида асирлар алмашинуви ёки бошқа келишувларга эришилса, мен бунга қарши эмасман. Шу боис АҚШ таклифини қўллаб-қувватлаймиз. Келажакда қандай бўлишини кўрамиз», — деди Зеленский.

Давлат раҳбари музокаралар жараёнидаги энг мураккаб масалалар сифатида Украина ҳудудий яхлитлиги, хавфсизлик кафолатлари, мамлакатни тиклаш учун зарур молиявий ёрдам ажратилиши ҳамда Запорожье атом электр станциясини бошқариш масалаларини санаб ўтди.