Ҳеч қандай “махсус ҳарбий операциялар” бўлмайди, агар...

Путин бутун Украинани эгаллаш ва Европанинг илгари СССР таркибига кирган айрим ҳудудларини Россияга қўшиб олишни истайди.

Бу ҳақда Reuters АҚШ разведка хизматлари хулосалари билан таниш бўлган олти нафар манбасига таяниб хабар бермоқда.

"Россия президенти фақатгина Украинани назорат қилиш билан чекланмай, илгари СССР таркибида бўлган Европа давлатлари ҳудудларини ҳам босиб олишни хоҳлайди", дея ёзади агентлик.

Reuters суҳбатдошлари тилга олган АҚШ разведкасининг сўнгги ҳисобот санаси 2025 йилнинг сентябри охирига тўғри келади. Қайд этилишича, АҚШ разведкасининг хулосалари кенг кўламли уруш бошланганидан бери ўзгармаган ва кўп жиҳатдан Европа разведка хизматлари фикрига мос келади.

"Разведка маълумотлари ҳар доим Путинга бундан ҳам кўпроғи кераклигини кўрсатиб келган. Европаликлар бунга ишонган, айниқса Полша бу фикрда қатъий. Болтиқбўйи давлатлари эса Украинадан кейин навбат ўзларига келади, деб ҳисоблайди", — деди Reuters билан суҳбатда АҚШ Вакиллар палатасининг разведка бўйича қўмитаси аъзоси Майк Куигли.

19 декабр куни бўлиб ўтган тўғридан-тўғри мулоқот чоғида Владимир Путин яна бир бор Россия Украина билан тинчлик келишуви тузишга тайёр эканини, бироқ бу Москванинг талаблари бажарилиши шарти билан бўлишини айтди. Шунингдек, у Россия Европага қарши “махсус ҳарбий операциялар” ўтказишни режалаштираётгани ҳақидаги тахминларни “бемаънилик” деб атади.

"Агар сиз бизга ҳурмат билан муносабатда бўлсангиз, ҳеч қандай “махсус ҳарбий операциялар” бўлмайди", — деди Россия президенти.