Зеленский Туркияда Путин билан учрашишга тайёрлигини билдирди

Украина Президенти Владимир Зеленский CNN Türk телеканалига берган интервьюсида Россия Президенти Владимир Путин билан Туркияда музокаралар ўтказишга тайёрлигини маълум қилди. Унинг таъкидлашича, Анқара бундай олий даражадаги учрашувни ташкиллаштиришда самарали воситачи бўла олади. Украина етакчиси Ражаб Тоййиб Эрдўғоннинг ҳам Путин, ҳам Дональд Трамп билан яхши муносабатларига умид боғлаб, турк томони воситачилигини юқори баҳолади.

Зеленскийнинг сўзларига кўра, эҳтимолий саммитнинг бош масаласи ишончли назорат механизмига эга бўлган тўлиқ ва шартсиз ўт очишни тўхтатишга эришишдан иборат бўлиши керак. Шу билан бирга, Киев ўз ҳудудларидан, жумладан Қрим ва Россия назорати остида турган бошқа майдонлардан воз кечиш ниятида эмаслигини яна бир бор уқтирди. Зеленскийнинг фикрича, аввало ҳозирги фронт чизиғи бўйлаб ҳарбий ҳаракатларни тўхтатиш, сўнгра қолган масалаларни муҳокама қилиш зарур.

Шунингдек, Украина президенти Эрдўғон билан Қора денгиз хавфсизлиги ва хавфсиз кемачиликни таъминлаш шартларини муҳокама қилганини айтди. Хусусан, у Украина ва Россия портларига қатнаётган савдо кемаларини ҳужумлардан ҳимоя қилиш таклифини илгари сурган. Бундан ташқари, давлат раҳбари ноябрь ойи ўрталарига қадар Абу-Дабида Украина, Россия ва АҚШ техник делегацияларининг уч томонлама музокаралари режалаштирилганини хабар қилди. Бироқ у фақат техник консультациялар етарли эмаслигини ва якуний келишувларга эришиш учун етакчиларнинг шахсий учрашуви шартлигини урғулади.

Зеленский Москвага нисбатан санкцияларни юмшатишга қарши чиқди ҳамда Туркия билан энергетика, мудофаа саноати ва қўшма ишлаб чиқариш соҳаларидаги ҳамкорликни кенгайтириш ниятида эканини билдирди.