Зеленский: РФ армияси октябрь ойида рекорд даражада йўқотишга учради

Украина Президенти Владимир Зеленскийнинг маълум қилишича, октябрь ойида Россия қўшинлари ҳалок бўлганлар ва оғир ярадорлар билан биргаликда 54 400 нафар ҳарбий хизматчисини йўқотган — бу кенг кўламли уруш бошланганидан бери қайд этилган энг юқори олий кўрсаткичдир.

Бундан ташқари, Украина томонининг баҳолашича, 21 октябрь куни Россия 2 250 нафар ҳарбийсини йўқотган бўлиб, бу ҳам бир кунлик йўқотишлар бўйича рекорд кўрсаткич ҳисобланади. Шунга қарамай, октябрь ойида Украина Қуролли Кучлари 96,2 км² ҳудудни озод қилишга эришди, бу РФ Қуролли Кучлари томонидан эгалланган майдондан 10,4 км² га кўпдир.

«Биз позицияларни ушлаб турибмиз, ҳудудларни озод қиляпмиз ва урушнинг ҳар бир куни агрессорга энг қимматга тушиши учун барча имкониятларни ишга соляпмиз. Ушбу ақлсиз йўқотишларни тўхтатиш учун Россиянинг ўт очишни тўхтатиш ва дипломатия йўлини танлаши кифоя», — дея таъкидлади Зеленский.

Ушбу баёнот ортидан The Economist журнали ўз ҳисоб-китобларини эълон қилди. Нашр маълумотларига кўра, Украинадаги кенг кўламли уруш бошланганидан бери Россиянинг умумий йўқотишлари (ҳалок бўлганлар ва ярадорлар) 1,4 миллиондан 2,1 миллион кишигача етиши мумкин. Нашрнинг баҳолашича, ҳалок бўлганлар сони 374 мингдан 770 минг кишигачани ташкил этмоқда.