Трамп Америка мустақиллигининг 250 йиллигини сиёсий саҳнага айлантирмоқда — BBC таҳлили

АҚШда мамлакат мустақиллигининг 250 йиллигини нишонлаш тадбирлари миллий бирлик рамзи бўлиши керак эди. Бироқ, BBC таҳлилчиси Энтони Зуркер фикрича, бу байрам тобора сиёсий қарама-қаршилик майдонига айланмоқда.

Президент Дональд Трамп юбилей муносабати билан ўтказиладиган бир қатор тадбирларда марказий ўринни эгаллашга ҳаракат қилмоқда. У Вашингтонда режалаштирилган 16 кунлик «Буюк Америка давлат ярмаркаси» доирасида ўзи иштирок этадиган йирик митинг ўтказиш ғоясини ҳам қўллаб-қувватлаган.

Айрим машҳур мусиқачилар юбилей тадбирларида қатнашишдан бош тортганидан сўнг, Трамп уларнинг иштироки шарт эмаслигини билдириб, «менга ортиқча ҳақ оладиган ва ҳамма нарсадан норози санъаткорлар керак эмас», дея баёнот берган.

Трамп 2025 йилда Оқ уйга қайтганидан буён ўзининг иккинчи президентлик муддати бир қатор йирик тарихий воқеалар — жумладан, футбол бўйича жаҳон чемпионати, 2028 йилги Олимпиада ва Америка мустақиллигининг 250 йиллиги билан бир вақтга тўғри келаётганини тез-тез таъкидлаб келмоқда.

Таҳлилчилар фикрича, президент ушбу байрамни миллий аҳамиятга эга тадбирдан кўра кўпроқ ўзининг сиёсий имижи ва ҳаракатини намоён қилиш имконияти сифатида кўрмоқда. Шу боис, мамлакат юбилейини нишонлаш жараёни ҳам АҚШдаги сиёсий баҳсларнинг яна бир қисмига айланиб бормоқда.