Путин урушни тугатиш бўйича музокараларга тайёрлигини билдирди

Россия Украинадаги урушни тугатиш бўйича музокараларга тайёр, шу жумладан АҚШ билан ҳам, деб маълум қилди мамлакат президенти Владимир Путин. Унинг сўзларига кўра, музокаралар бошланишига Киев томонидан тўсиқ қўйилмоқда. Путин бу борада Украина президенти Владимир Зеленский чиқарган фармонни мисол қилиб келтирди, унга кўра, у Россия раҳбари сифатида музокара ўтказиши тақиқланган.

Владимир Путин шунингдек, музокараларни тўхтатишда Жо Байден маъмуриятини айблади. Унинг таъкидлашича, Москва ҳеч қачон Вашингтон билан мулоқотдан воз кечмаган. Россия президентининг фикрича, мулоқотни қайта бошлаш учун энг яхши формат унинг Дональд Трамп билан шахсий учрашуви бўлиши мумкин, бироқ бу имконият "амалдаги Америка маъмуриятининг қарорлари ва танловига боғлиқ".

Трамп билан бўлган муносабатларини Путин "фаолиятга доир ишчан, прагматик ва ишончли" деб таърифлади. Шу билан бирга, у Трампнинг биринчи президентлик муддати давомида Россияга қарши ўша пайтдаги энг катта санкцияларни жорий қилганини эслатиб ўтди.

Шунингдек, Путин Кремль ва АҚШнинг янги маъмурияти ўртасида "бугунги куннинг муҳим масалалари бўйича ечим излашда анча кўп умумий нуқталар бўлиши мумкин"лигини қайд этди. У стратегик барқарорлик, иқтисодиёт ва нефть нархлари муаммоларини бундай нуқталар қаторида тилга олди.