Одессадаги қонли воқеа: Европа суди Украинани айбдор деб топди

Инсон ҳуқуқлари бўйича Европа суди (ИҲЕС) 2014 йил 2 май куни Одессада Россия ва Украина тарафдори бўлган фаоллар ўртасидаги тўқнашувлар пайтида 47 киши ҳалок бўлгани билан боғлиқ давлатнинг ҳаракатсизлиги ҳақидаги бир қатор даъволар бўйича қарор чиқарди.

The Insider нашрининг хабар беришича, суд воқеалар асосан Россия тарғиботи туфайли юз берганини таъкидлаган бўлса-да, Украина давлати томонидан йўл қўйилган қонунбузарликларни ҳам алоҳида қайд этган ва энди давлат товон тўлашга мажбур бўлди.

ИҲЕС қарори "Майдонга қарши" сепаратистларнинг Украина тарафдори намойишчиларига ҳужуми билан бошланган фожиали воқеаларга тааллуқли. Кейинги тўқнашувлар Куликово майдонидаги "Майдонга қарши" гуруҳ лагерига ҳужум ва Касаба уюшмалари уйидаги ёнғинга олиб келди, бу ерда ўнлаб одамлар ҳалок бўлди. Даъвогарлар орасида ҳалок бўлган 25 кишининг қариндошлари ва ёнғиндан омон қолган уч киши бор.

Суд таъкидлашича, Одесса полицияси намойишчиларга ўқотар қурол билан ҳужум қилинишининг олдини олиш учун "амалда ҳеч нарса қилмаган", тартибсизликларга тайёргарлик ҳақидаги кўплаб оператив маълумотларни эътиборсиз қолдирган. Шунингдек, ИҲЕС "ёнғин ўчириш машиналарининг ҳодиса жойига етиб келиши атайлаб 40 дақиқага кечиктирилгани ва полиция одамларни ёнаётган бинодан эвакуация қилишга ёрдам бериш учун аралашмагани"ни исботланган деб ҳисобламоқда.

Украина Инсон ҳуқуқлари бўйича Европа конвенциясининг яшаш ҳуқуқига оид моддасини бузганликда айбдор деб топилди. Давлат ҳар бир ҳалок бўлган кишининг қариндошларига 15 минг евродан ва оғир куйиш жароҳатини олган учта тирик қолган даъвогарга 12 минг евродан тўлаши шарт. Энг катта, 17 минг евро миқдоридаги товон пулини Касаба уюшмалари уйида ҳалок бўлган Михаил Вячеславовнинг қизи олади, чунки ҳокимият унинг отасининг жасадини дафн этиш учун беришни асоссиз равишда узоқ вақт рад этган.