"Критик даражага етдик!" Россия муҳожирлар оқимини бутунлай тўхтатиши мумкин (?)

Россияда муҳожирларнинг киришини бутунлай тақиқлаш таклиф этилди.

Россияда мигрантларнинг мамлакатга киришини 2025 йил охиригача бутунлай тақиқлаш таклиф этилмоқда. Бу ҳақда ЛДПР партияси раҳбари Леонид Слутский РИА Новостига берган интервьюсида маълум қилди.

Унинг айтишича, бу фуқаролар хавфсизлигини таъминлаш учун зарур. Слутский мамлакатдаги муҳожирлар сони "критик даражага" етганини таъкидлаб, россияликлар манфаатларини инобатга олган ҳолда аниқ миграция сиёсатини ишлаб чиқиш муҳимлигини қайд этди.

У, шунингдек, Росстат маълумотларини ҳам келтирди. Унга кўра, ўтган йил якунида келган муҳожирлар сони 568,5 минг кишига ортган. Бу 1995 йилдан буён энг юқори кўрсаткич бўлиб, ўшанда 599 минг кишини ташкил этган эди. "Агар биз хавфсизликни истасак, келганларнинг эҳтимолий кўп минг сонли тартибсизликларни олдиндан кўра олсак, шошилинч чоралар кўришимиз шарт," - деди парламент аъзоси.

Сиёсатчи, шунингдек, агар иқтисодиётга муҳожирлар керак бўлса, уларни фақат вақтинча, фуқаролик ёки ижтимоий имтиёзларни олиш имкониятисиз киритиш лозимлигини таъкидлади.