Opta Чемпионлар лигасининг асосий фаворитини эълон қилди

Opta суперкомпьютери 2026/27 йилги Чемпионлар лигаси якунлари бўйича прогнозини тақдим этди.

Ҳисоб-китобларга кўра, мусобақанинг асосий фаворити "Арсенал" ҳисобланади. Лондон клубининг чемпион бўлиш эҳтимоли 21,2 фоиз деб баҳоланган.

Микель Артета жамоасининг асосий рақиби сифатида "Бавария" кўрсатилган. Мюнхенликларнинг ғалаба эҳтимоли 19,9 фоизни ташкил қилади.

Учинчи ўринда "Манчестер Сити" — 12 фоиз. Чемпионлар лигасининг амалдаги ғолиби "Пари Сен-Жермен" эса 7,7 фоизлик кўрсаткич билан тўртинчи ўринда.

Кейинги ўринларда "Барселона" — 7 фоиз, "Реал" — 5,1 фоиз, "Ливерпуль" — 5,1 фоиз, "Манчестер Юнайтед" — 3,7 фоиз, "Интер" — 3,4 фоиз ва "Астон Вилла" — 2 фоиз билан жойлашган.

Прогнозни тайёрлаш учун Opta суперкомпьютери мавсумни 10 минг марта симуляция қилган.

Ўтган йили ҳам Opta асосий фаворит сифатида "Ливерпуль"ни кўрсатган эди, аммо инглиз клуби чорак финалда "ПСЖ"га имкониятни бой берган.