Карантин қоидаларига зид равишда энг кўп тўй қайси вилоятда ўтказилган?

Республика бўйича карантин қоидаларига риоя қилмаган ҳолда ўтказилган энг кўп тўй маросимлари Фарғона вилоятида аниқланган. Бу ҳақда ИИВ Ҳуқуқбузарликлар профилактикаси бош бошқармаси бошлиғи полковник Бахтиёр Бердиалиев «Дарё» мухбири Мусулмонбек Иброҳимовга берган қисқача интервьюсида айтиб ўтди.

Полковник Бахтиёр Бердиалиевнинг маълум қилишича, 16 августдан буён маҳалла фаоллари ва ички ишлар органларининг профилактика инспекторлари томонидан олиб борилган назорат тадбирлари натижасида карантин қоидаларига риоя қилмаган ҳолда ўтказилган 243 та тўй маросими аниқланган.

«Жумладан, Тошкент шаҳрида 1 та, Сирдарёда 31 та, Фарғонада 75 та, Жиззахда 20 та, Қашқадарёда 20 та, Бухорода 7 та, Андижонда 11 та, Сурхондарёда 20 та, Хоразмда 7 та, Навоийда 5 та, Наманганда 30 та, Самарқандда 10 та ва Қорақалпоғистонда 6 та ҳолатда карантин қоидаларига риоя қилинмай тўй маросимлари ўтказилган. Барча маросим эгаларига нисбатан баённомалар расмийлаштирилган», – деди Бахтиёр Бердиалиев.

Ҳуқуқбузарликлар профилактикаси бош бошқармаси бошлиғининг таъкидлашича, асосий мақсад чора кўриш ёки жазолаш эмас. «Ҳар бир ўтказилаётган маросимда хонадон аъзолари ва ташриф буюрадиган меҳмонларнинг саломатликларини асраш муҳимлигини аҳолига тушунтириш», дея қўшимча қилди полковник.