Германияда илк бор аёл президент сайланиши мумкин

Германия канцлери Фридрих Мерц мамлакатнинг навбатдаги президенти лавозимига аёл номзодни илгари суриш ниятида. Унинг бу қарорини ҳукуматдаги коалиция ҳамкори — Социал-демократик партия ҳам қўллаб-қувватлади. Германия Федератив Республикасининг 77 йиллик тарихида ҳали бирор аёл президент бўлмаган.

DW’нинг ёзишича, dpa ва AFP агентликлари 2 ноябр куни Берлинда ўтказилган Христиан-демократик иттифоқ ҳудудий бўлинмалари раҳбарларининг ёпиқ йиғилиши иштирокчиларига таяниб, Мерцнинг режаси ҳақида хабар берган.

Канцлер ўзи раҳбарлик қилаётган партияга марказчи сиёсий кучлар вакили бўлган аёлни ягона номзод сифатида таклиф қилмоқчи.

«Бу айнан аёл бўлиши керак, деган қатъий қарорга келдим», — дея Мерцнинг йиғилишдаги сўзларини келтирган агентликлар.

Маълумотларга кўра, канцлер учрашувда аниқ бир шахснинг исмини айтмаган. У номзодни Христиан-демократик иттифоқ президиумининг 9 ноябрдаги йиғилишига қадар тақдим этиши кутилмоқда.

Аввалроқ Германиянинг собиқ канцлери Ангела Меркел ҳам амалдаги президент Франк-Валтер Штайнмайернинг ўрнини аёл эгаллаши кераклигини айтган эди.

Унинг фикрича, ҳар ким ўзига бунинг вақти келмадимикан, деган саволни бериши керак.

Христиан-социал иттифоқ раҳбари Маркус Зёдер бир неча ойдан буён Илзе Айгнер номзодини қўллаб-қувватлаб келмоқда. Айгнер Бавария парламенти — ландтаг раиси лавозимида ишлайди.

Христиан-демократик иттифоқда эса бошқа эҳтимолий номзодлар қаторида Бундестаг раиси Юлия Клёкнер, Германия таълим вазири Карин Прин ва партиянинг собиқ раҳбари Аннегрет Крамп-Карренбауэр номзодлари муҳокама қилинмоқда.

Амалдаги президент Франк-Валтер Штайнмайер ушбу лавозимда икки муддат ишлагани сабабли навбатдаги сайловда ўз номзодини қўя олмайди.

Германия президентини сайлаш ваколатига эга Федерал йиғин 2027 йил 30 январ куни янги давлат раҳбарини сайлаш учун тўпланади. Бу сана Бундестаг томонидан расман белгиланган.