АҚШ Давлат котиби Марко Рубио «Катта йигирматалик» (G20) ташқи ишлар вазирларининг анъанавий умумий суратга тушиш маросимини бекор қилди. Бунга бир неча европалик дипломатнинг Россия ташқи ишлар вазири Сергей Лавров билан ёнма-ён суратга тушишдан бош тортиши ва акс ҳолда зални тарк этиш билан таҳдид қилиши сабаб бўлган. Бу ҳақда Euronews хабар берди.

Ҳодиса 30 октябрь куни АҚШнинг Атланта шаҳрида бўлиб ўтган G20 ташқи ишлар вазирлари учрашуви доирасида юз берган. Икки нафар америкалик расмийнинг анонимлик шарти билан маълум қилишича, Марко Рубио қўшимча баҳс-мунозараларнинг олдини олиш мақсадида умумий суратга тушиш маросимини бекор қилишга қарор қилган.

Музокараларни очар экан, Рубио учрашув самарали ўтишига умид билдирган. У дунё ўзаро боғлиқ иқтисодий ва геосиёсий инқирозларга дуч келаётганини, уларнинг кўпчилиги глобал иқтисодий тартибнинг асосларига жиддий таҳдид солишини таъкидлаган.

Польша бош вазири ўринбосари ва ташқи ишлар вазири Радослав Сикорский умумий суратнинг бекор қилинишини АҚШнинг тўғри қарори деб баҳолади. «Лавров билан суратга тушишни истамайдиган ягона одам мен эмасман», — деди у Атлантада журналистларга.

Германия ташқи ишлар вазири Йоханн Вадефуль эса Россия билан одатий муносабатлар мавжуд эмаслигини, бироқ мураккаб масалаларни музокаралар столида муҳокама қилиш зарурлигини айтди. Шу билан бирга, у Россия билан муносабатларда асоссиз ижобий тасаввур уйғотмаслик кераклигини таъкидлади.

Умумий сурат атрофидаги баҳс G20 доирасидаги кескинликни яна бир бор намоён этди. Учрашувда Украинадаги уруш, АҚШ ва Исроилнинг Эронга қарши ҳарбий ҳаракатлари, Америка божлари ҳамда Жанубий Хитой денгизидаги низолар юзасидан ҳам жиддий келишмовчиликлар мавжуд.

Бундан аввал ҳам бир қатор G20 давлатлари Украина ҳудудига Россия томонидан ракета ва дронлар орқали ҳужумлар кучайган бир пайтда Москва вакилининг учрашувга таклиф этилганидан хавотир билдирган эди.

АҚШ президенти Дональд Трампнинг Россияга қарши янги санкциялар масаласидаги позицияси ҳам Вашингтоннинг иттифоқчилари билан муносабатларини мураккаблаштирган. Шунингдек, АҚШнинг Киевга логистика ва разведка соҳасидаги ёрдамини вақтинча чеклаши Вашингтон ва Украина ўртасидаги зиддиятларни кучайтирган.