Эрон билан можаро ва Конгресс сайловлари АҚШни Венесуэла билан битимга ундади

Эрон билан чўзилиб кетган можаро ва АҚШ Конгрессига яқинлашаётган оралиқ сайловлар Дональд Трамп маъмуриятини Венесуэла билан нефть бўйича келишувни имкон қадар тезроқ эълон қилишга ундаган.

Бу ҳақда The Wall Street Journal манбаларига таяниб хабар берди.

Нашр суҳбатдошларининг айтишича, Трамп маъмуриятида «Эрон билан омма орасида қўллаб-қувватланмаётган ва узоққа чўзилган уруш жаҳон энергия ресурслари таъминотига салбий таъсир кўрсатаётган бир пайтда» Венесуэла билан келишувни зудлик билан жамоатчиликка маълум қилиш зарур, деган фикр устун бўлган.

Манбаларга кўра, Конгрессга оралиқ сайловлар арафасида Трамп учун «америкаликларни Яқин Шарқдаги беқарорлик оқибатларидан ҳимоя қила олишини» намойиш этиш ҳам муҳим бўлган.

WSJ маълумотига кўра, Венесуэла билан нефть келишуви бўйича музокаралар бир неча ой давом этган. Шу вақт ичида АҚШ расмийлари Каракасга бир неча бор ташриф буюрган.