“Энергетик мустақиллик” йўлида яна бир қадам қўйдик"

Чехия ҳукумати мамлакат Россиянинг нефт етказиб беришидан тўлиқ мустақил бўлганини эълон қилди.

"Чехия энди Италиянинг Триест портини Марказий Европа давлатлари билан боғлайдиган Транс Алп қувури (ТАL) орқали кўпроқ нефт олишни бошлади. Эндиликда Чехия Ғарб нефт қувурлари орқали йилига саккиз миллион тоннагача нефт олиши мумкин, бу эса мамлакатдаги нефтни қайта ишлаш заводларининг бутун эҳтиёжини тўлиқ қоплайди. “Энергетик мустақиллик” йўлида яна бир қадам қўйдик" — дея маълум қилди Чехия бош вазири Петр Фиала.

Бунгача Чехия нафақат ТАL қувури орқали, балки Россиянинг “Дружба” нефт қувури орқали ҳам нефт оларди. Ушбу қувур орқали 1962 йилдан бошлаб Россия нефти етказиб берилган.

2024 йилда Чехия “Дружба” орқали 2,7 миллион тонна нефт олган, бу эса мамлакатга жами етказилган нефтнинг 42 фоизини ташкил этган. Сўнгги ҳафталарда “Дружба” орқали Чехияга нефт етказиш тўхтатилган. Россия-Украина уруши бошланганидан сўнг, Чехия ҳукумати Россия нефтидан воз кечиш мақсадида ТАL қувурининг имкониятларини кенгайтиришга қарор қилганди.