119 ёшли костарикалик эркак дунёдаги энг кекса инсон сифатида тан олинишини кутмоқда

Коста-Риканинг Сардинал шаҳрида яшовчи Хосе Флорес ўзининг 119 ёшда эканини тасдиқловчи ҳужжатлар асосида дунёдаги энг кекса инсон сифатида тан олинишга ҳаракат қилмоқда.

Флореснинг оиласи ва расмий ҳужжатларига кўра, у 1907 йил 11 июль куни туғилган. Агар унинг туғилган санаси халқаро экспертлар томонидан тасдиқланса, Флорес дунёдаги энг кекса инсон мақомига эга бўлиши мумкин. Ҳозирда мутахассислар унинг ёшига оид тарихий ҳужжатларни текширмоқда.

Флорес Коста-Риканинг Тинч океани соҳилидан тахминан 20 дақиқалик масофада жойлашган Сардинал шаҳридаги оддий ёғоч уйда яшайди. Унинг кундалик ҳаёти асосан дам олиш, набираси тайёрлаган таомларни истеъмол қилиш ва у билан суҳбатлашиб вақт ўтказишдан иборат.

Сардинал Никоя ярим оролида жойлашган бўлиб, бу ҳудуд дунёдаги узоқ умр кўрувчилар кўп учрайдиган бешта «Кўк ҳудуд»дан бири сифатида танилган. Бу жойларда одамлар нисбатан узоқ ва соғлом ҳаёт кечириши ҳамда 100 ёшга етиши эҳтимоли юқори экани қайд этилган.

Маҳаллий аҳоли узоқ умр кўришни кальций ва магнийга бой сув, маккажўхори ҳамда ловияга асосланган овқатланиш, жисмоний меҳнат, мустаҳкам оилавий ва жамоавий алоқалар билан боғлайди.

Флореснинг набираси ва уни парвариш қилаётган Ҳеллен Флореснинг айтишича, унинг бобоси бутун умри давомида қишлоқда меҳнат қилган ва ҳозир ҳам хотиржам ҳамда бахтли ҳаёт кечирмоқда. У баъзан ўтган ҳаёти ҳақида ҳикоялар айтиб беради, ҳазиллашади ва узоқ умр кўришининг асосий сабабларидан бири оиласи эканини таъкидлайди.

«Муҳаббатсиз, меҳрсиз ва ғамхўрликсиз у бугунгача етиб келмаган бўлар эди», — деди Ҳеллен Флорес.

Никоя ярим оролида узоқ умр кўришни ўрганувчи ташкилот асосчиси Хорхе Виндаснинг таъкидлашича, узоқ умр кўришга оила ва ижтимоий алоқалар, маънавият, кучли эътиқод, жисмоний фаоллик, соғлом овқатланиш ва кам стресс билан кечадиган ҳаёт ҳам таъсир қилади.

Флореснинг шахсини тасдиқловчи ҳужжатида унинг 1907 йил 11 июль куни туғилгани кўрсатилган. Мутахассислар унинг ёшини тасдиқлаш учун туғилганлик ҳақидаги гувоҳнома, чўқинтириш ҳақидаги ҳужжатлар, фарзандлари туғилган даврга оид маълумотлар ва кейинги ҳаётига тегишли бошқа архив ҳужжатларини ўрганмоқда.

Виндаснинг сўзларига кўра, барча ҳужжатлар текширилиб, халқаро ташкилотлар, жумладан, Гиннеснинг рекордлар китоби томонидан тасдиқлангач, Флореснинг ёши бўйича расмий хулоса берилиши мумкин.

Флореснинг оиласи ушбу жараён якунланишини умид билан кутмоқда. Ҳеллен Флореснинг таъкидлашича, агар унинг бобоси дунёдаги энг кекса инсон сифатида расман тан олинса, бу нафақат оиласи, балки бутун Коста-Рика учун ҳам фахрли воқеа бўлади.

Хосе Флореснинг саккиз нафар фарзанди бўлган. Ҳозирда унинг 23 нафар набираси, 25 нафар чевараси ва бир нафар эвараси бор.

Айни пайтда дунёдаги расман тан олинган энг кекса инсон — британиялик Этель Кэтерхэм ҳисобланади. У 1909 йил 21 август куни Англиянинг Хэмпшир графлигида туғилган ва 2026 йилда 117 ёшга тўлган. Кэтерхэм 2025 йил апрель ойида бразилиялик роҳиба Инья Канабарру Лукас вафот этганидан сўнг дунёдаги энг кекса инсон сифатида тан олинган.