АҚШ Президенти Дональд Трампнинг матбуот котиби лавозимида атиги беш кун ишлаган Кэти Захария ишдан бўшатилганидан кейин президент билан тушган суратини эълон қилди. Сурат орқали Трампнинг Вашингтондаги тарихий Ист-Потомак боғидаги гольф майдонини қайта қуриш режаси ошкор бўлган бўлиши мумкин.

Суратда Трамп Овал кабинетдаги иш столида ўтирган, Захария эса унинг ёнида турган. Стол устидаги харита тасвири хиралаштирилган бўлса-да, кузатувчилар унда Ист-Потомак тарихий боғининг шаклларини пайқаган.

Трампнинг ушбу ҳудуддаги гольф майдонини қайта қуриш режаси бир неча ойдан бери баҳсларга сабаб бўлмоқда. Лойиҳа доирасида боғда 400 дан ортиқ дарахт кесилган. Кейинчалик федерал судья дарахтларни кесиш ишларини вақтинча тўхтатган. Трамп маъмурияти эса судьяни «душманлик кайфиятида» бўлишда айблаган.

Шунингдек, ҳукумат гольф майдонининг якуний лойиҳаси ҳали тайёр эмаслигини, у экологик экспертиза ва тарихий меросни муҳофаза қилиш талаблари бўйича текширувдан ўтиши кераклигини билдирган.

Бироқ президент столидаги харита лойиҳанинг аниқ режаси мавжудлигини кўрсатиши мумкин. Save East Po ташаббускорлар гуруҳи бу ҳолатга кинояли муносабат билдириб, президент столида режага ўхшаш харита турган суратни «Бизда ҳеч қандай режа йўқ» деган гапга энг яхши мисол, деб атади.

Трамп режа мавжудлигини тан олди

Сурат атрофидаги шов-шувдан сўнг Трамп боғни қайта қуриш режаси борлигини тан олгани айтилмоқда. Гольф майдонини 15 ойга ёпиш ва уни халқаро даражадаги мусобақаларни ўтказишга мослаштириш режалаштирилган.

Бироқ лойиҳага қарши чиқувчилар ва суд жараёнлари унинг амалга оширилишини қийинлаштириши мумкин.

Кэти Захария эса махфий маълумотни ошкор қилгани учун ўзини айбдор деб ҳисобламаслигини билдирди. У оддий ва ёқимли суратни можарога айлантираётганлардан норозилигини айтди.

Оқ уйнинг коммуникациялар бўйича директори Стивен Чунг ҳам оммавий ахборот воситаларини «безарар сурат»дан муаммо излаётганликда айблади.