Zelenskiyga Ukrainada saylov o‘tkazish tavsiya qilindi? Bu nima uchun kerak?

AQSh prezidenti Donald Tramp Vladimir Zelenskiy Ukrainada prezidentlik saylovlarini o‘tkazishi kerakligini aytdi.

«Menimcha, u saylov o‘tkazishi kerak. U bu mojaroni ko‘p marta hal qilishi mumkin edi va endi saylov o‘tkazishi lozim», — dedi Tramp jurnalistlarga.

Bir kun oldin AQSh prezidenti Vladimir Zelenskiyni Rossiya neftni qayta ishlash zavodlariga zarba bermaslik haqidagi AQSh iltimoslarini e’tiborsiz qoldirishda ayblagan va Ukrainaga Moskva bilan kelishuvga erisha oladigan yangi rahbar kerakligini bildirgan edi.

Trampning bu bayonotlari juma kuni Mayamida Vashington va Ukraina vakillari o‘rtasida bo‘lib o‘tgan muzokaralar fonida yangradi. Ommaviy axborot vositalari ma’lumotlariga ko‘ra, dastlab ikki kun davom etishi rejalashtirilgan uchrashuv muddatidan oldin yakunlangan. Ta’kidlanishicha, bunga Tramp Vladimir Putin bilan telefon orqali suhbatlashganidan keyin bir kun oldin e’lon qilgan dizel yoqilg‘isi bo‘yicha kelishuv sabab bo‘lgan.

Shanba kuni Rossiya hukumati dizel yoqilg‘isini eksport qilishga qo‘yilgan taqiqni qisman bekor qildi. Rossiya bosh vaziri o‘rinbosari Aleksandr Novak ta’kidlashicha, Moskva oktyabr oyida AQSh va jahon bozorlariga 300 ming tonna, noyabrda 500 ming tonna, dekabrda esa bir million tonnagacha dizel yoqilg‘isi yetkazib berishga tayyor. Kelgusida bu hajm oyiga uch million tonnagacha oshirilishi mumkin.

Novakning qayd etishicha, bunda Rossiya ichki bozori dizel yoqilg‘isi bilan to‘liq ta’minlanib qoladi.