Xitoy sun’iy intellekt yordamida uzoq masofaga va balandlikka uchuvchi dron yaratdi

Xitoyning sun’iy intellekt bilan jihozlangan eng yangi Rainbow-9 (Sayxun-9) uchuvchisiz uchish apparati 10 ming km dan ortiq masofani bosib o‘tishga qodir. Bu haqda TASS xabar beradi.

Davlat teleradiokompaniyasi CCTV Shensi provinsiyasidagi aerodromda parvoz sinovlari chog‘ida Rainbow-9 tasvirini namoyish etdi, deb xabar beradi South China Morning Post (SCMP). Qurilma 20 soatdan ortiq davom etgan parvozni amalga oshirdi.

Harbiy tahlilchi Sun Chjunpin nashrga aytishicha, Rainbow-9 ga sun’iy intellekt tizimlarini o‘rnatish "uning jangovar samaradorligini sezilarli darajada oshiradi". Uning qayd etishicha, Rainbow-9 bir vaqtning o‘zida bir nechta dronlarni boshqarishi mumkin. Bundan tashqari, qurilma boshqariladigan jangovar samolyotlar bilan birgalikda ishlashga qodir. "Rainbow-9 kabi uchuvchisiz apparatlarning boshqariladigan qiruvchi samolyotlar bilan birga ishlashi mutlaqo normal holat", - deya qo‘shimcha qildi ekspert.

Apparat 0,5 Max dan 0,75 Max gacha tezlikda uchib, 40 soatgacha havoda turishga mo‘ljallangan. Bu unga 10 ming km dan ortiq masofani bosib o‘tish imkonini beradi. SCMP ta’kidlaganidek, Xitoy aerokosmik fan va texnologiya korporasiyasi (CASC) tomonidan ishlab chiqilgan Rainbow-9 seriyadagi eng ilg‘or dron hisoblanadi. Uning qanotlari kengligi 24,8 metr bo‘lib, 10 000 metrdan yuqori balandliklarda uzoq muddatli missiyalar uchun yetarlicha ko‘tarish qobiliyatini ta’minlaydi.