Vyetnamda "Kajiki" to‘foni yetti kishining hayotiga zomin bo‘ldi

Vyetnam hukumati mamlakatni qamrab olgan va hali ham davom etayotgan "Kajiki" to‘foni oqibatlari haqida ma’lum qildi.

Hukumat saytida e’lon qilingan dastlabki ma’lumotlarga tayanib xabar berishicha, to‘fon sabab kuchli yomg‘ir yetti kishining hayotiga zomin bo‘lgan, 12 mingdan ortiq uy vayron bo‘lgan yoki shikastlangan, mamlakat poytaxti Xanoyning katta qismini suv bosgan.

Bundan tashqari, toshqin natijasida 81,5 ming gektardan ortiq sholi plantasiyalari va 4,5 ming gektar boshqa qishloq xo‘jaligi ekinlari vayron bo‘lgan, 1,6 million kishi elektr energiyasidan mahrum bo‘lgan.

Vyetnam Bosh vaziri Fam Min Trin mamlakat vazirliklari va idoralari rahbarlari, yirik korporasiyalar rahbarlari va viloyat hokimiyatlariga yo‘llangan jo‘natmani imzoladi. Hujjatda to‘fon oqibatlariga qarshi kurashish bo‘yicha ko‘rsatmalar ro‘yxati keltirilgan. Xususan, uy-joylar, transport va tarmoq infratuzilmasini tiklash, bedarak yo‘qolganlarni qidirish, qishloq xo‘jaligi tashkilotlariga yetkazilgan zararni kamaytirish uchun kuch va vositalarni safarbar etish topshirildi.

Vyetnam meteorologiya agentligining prognozlariga ko‘ra, 27 avgust kuni kuchli yomg‘ir davom etadi, mamlakat shimoli va shimoli-sharqidagi ba’zi hududlarda 70 mm gacha yog‘ingarchilik kuzatiladi. Shuningdek, to‘qqiz xil viloyatda "to‘lqinli suv toshqinlari va ko‘chkilar" xavfi mavjud.