O‘zbekiston FAO Kengashiga saylandi

O‘zbekiston tarixda ilk bor BMTning Oziq-ovqat va qishloq xo‘jaligi tashkiloti (FAO) Kengashiga 2028–2029 yillar uchun a’zo sifatida saylandi. Bu mamlakatning global qishloq xo‘jaligi siyosatdagi o‘rni kuchayib borayotganini ko‘rsatadi.

2025 yil 4 iyul kuni Italiyaning Rim shahrida bo‘lib o‘tgan saylovda O‘zbekiston Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) Kengashiga saylandi. O‘zbekiston ushbu organga tarixda birinchi marta bir ovozdan saylangani ma’lum qilindi.

FAO Kengashi 3 yillik muddatga saylanadigan 49 davlatdan iborat bo‘lib, u tashkilot byudjeti, dasturlari hamda muhim qarorlar va tavsiyalarni muhokama qilish vakolatiga ega. Ushbu saylov natijasi O‘zbekistonning qishloq xo‘jaligi va oziq-ovqat xavfsizligi sohasidagi islohotlari xalqaro darajada e’tirof etilganini anglatadi.

Tashqi ishlar vazirligi ta’kidlashicha, FAO Kengashiga a’zolik O‘zbekistonga xalqaro oziq-ovqat siyosati va standartlarni ishlab chiqish, milliy tashabbuslarni ilgari surish hamda yangi moliyaviy resurslar jalb etishda katta imkoniyatlar yaratadi.

FAO — BMT tarkibidagi maxsus agentlik bo‘lib, dunyo miqyosida ocharchilikka qarshi kurashish va oziq-ovqat xavfsizligini ta’minlashni maqsad qiladi. Unga 194 mamlakat va Yevropa Ittifoqi a’zo bo‘lgan. Tashkilotning bosh qarorgohi Rimda joylashgan va u 130 dan ortiq mamlakatda faoliyat olib boradi.