O‘zbek musiqa san’atida o‘zining samimiy ijodi, hayotiy qo‘shiqlari va o‘ziga xos musiqiy uslubi bilan muxlislar e’tiborini qozonib kelayotgan ijodkorlardan biri — Ulug‘bek Yo‘lchiyev. Qariyb yigirma yilga yaqin davom etayotgan ijodiy faoliyati davomida u shoir, bastakor, xonanda va ijodkor sifatida turli bosqichlarni bosib o‘tdi. Bugungi kunda esa Ulug‘bek Yo‘lchiyev nafaqat O‘zbekiston, balki Markaziy Osiyo musiqa maydonida ham o‘z auditoriyasini shakllantirib bormoqda.
Ijodga she’riyatdan boshlangan yo‘l
Ulug‘bek Yo‘lchiyev 1989 yil 12 sentyabrda Jizzax viloyati, Sharof Rashidov tumanida tug‘ilgan. 40-maktabni tamomlagach, 2008–2012 yillarda O‘zbekiston davlat san’at va madaniyat institutida tahsil oldi.
Uning san’atdagi ilk qadamlari xonandalikdan emas, she’riyatdan boshlandi. 2008–2009 yillarda talabalik davridayoq she’rlar yozib, turli xonandalar bilan ijodiy hamkorlik qila boshladi.
Keyinchalik uning ijodiy izlanishlari yangi bosqichga ko‘tarildi. 2010–2011 yillarda Ulug‘bek she’r yozish bilan birga ularga musiqa bastalashni ham boshladi.
Uning ilk sotilgan musiqiy asarlaridan biri Anvar Sanayev ijrosidagi «Bahorimni sog‘indim» qo‘shig‘i bo‘ldi. Qo‘shiqning ham matni, ham musiqasi Ulug‘bek Yo‘lchiyev tomonidan yaratilgani uning bastakorlik salohiyatini namoyon etdi.
Keyingi yillarda u o‘zbek estrada sahnasining turli vakillari bilan hamkorlik qildi. Jasur Umirovning «Onajon», Bahodir Qodirovning «Sevgisi yolg‘on», Bojalar guruhining «Jadidlar», Ulug‘bek Qodirovning «Ot do‘shi», Bahrom Nazarovning «Olcha guli» kabi qo‘shiqlarida uning ijodiy hissasi bor.
«Shohzamon» — katta sahnaga olib chiqqan taxallus
Ulug‘bek Yo‘lchiyev xonanda sifatidagi faoliyatini «Shohzamon» taxallusi ostida boshladi.
2012 yilda uning ilk «Hindistondan xat» albomi tinglovchilarga taqdim etildi. Keyinchalik «Qo‘zigul» kabi albom va qo‘shiqlar orqali o‘z uslubini izlagan ijodkor dastlab kutilgan darajadagi ommaviy muvaffaqiyatga erisha olmadi.
Biroq bu davr Ulug‘bek uchun ijodiy tajriba va katta maktab vazifasini bajardi.
2016 yil esa «Shohzamon» ijodida tub burilish yasadi. U Sardor Rahimxon bilan birgalikda ijro etgan «Narxi qancha mehrni ayting» qo‘shig‘i katta ommalashuvga erishib, ijodkor nomini keng auditoriyaga olib chiqdi.
Mazkur duet «Eng yaxshi duet», «Yilning eng yaxshi qo‘shig‘i» va «Yil xiti» kabi nominasiyalarda e’tirof etildi.
Shu yil oxirida onasiga bag‘ishlangan «Onam mani» qo‘shig‘i ham tinglovchilar orasida katta qiziqish uyg‘otdi. Bu asar Ulug‘bekning ijodida alohida o‘rin egallab, uning qo‘shiqlarida oilaviy qadriyatlar va insoniy tuyg‘ular muhim mavzu ekanini ko‘rsatdi.
2017 yilda taqdim etilgan «Lola» qo‘shig‘i ham muxlislar tomonidan iliq kutib olindi.
Tanaffusdan qaytish
2018–2020 yillar oralig‘ida sog‘lig‘i va boshqa hayotiy muammolar sabab Ulug‘bek ijodiy faoliyatida tanaffus qilishga majbur bo‘ldi.
Ammo bu tanaffus uning san’atga bo‘lgan qiziqishini so‘ndirmadi.
2021 yilda u «Mayxona» qo‘shig‘i bilan yana musiqiy maydonga qaytdi. Qo‘shiq, ayniqsa, yosh tinglovchilar orasida ommalashdi.
Shuningdek, Ulug‘bek Yodgor Mirzajonov bilan avval ijro etilgan «Yo‘llarimiz ayro» qo‘shig‘ini qayta ishlab, yakkaxon tarzda taqdim etdi. U MMA jangchisi Murod Xonto‘rayev xotirasiga bag‘ishlangan qo‘shiq orqali ham muxlislariga murojaat qildi.
Qariyb 11 yil davomida «Shohzamon» nomi bilan ijod qilgan Ulug‘bek keyinchalik ushbu taxallusdan voz kechib, o‘zining haqiqiy ismi bilan yangi ijodiy bosqichni boshlashga qaror qildi.
Ulug‘bek Yo‘lchiyev nomi ostidagi yangi davr
2023 yildan boshlab ijodkor faoliyatini Ulug‘bek Yo‘lchiyev nomi ostida davom ettira boshladi.
Yangi bosqichning ilk muhim ishlaridan biri otasining xotirasiga bag‘ishlangan «Sog‘inayapman dadamni»qo‘shig‘i bo‘ldi. Shuningdek, Bojalar guruhi bilan hamkorlikda yaratilgan «Dadamning omadi», «Boyniki» va «Yuragim» kabi qo‘shiqlar ham tinglovchilarga taqdim etildi.
2024 yil Ulug‘bek Yo‘lchiyev ijodida sermahsul davr bo‘ldi.
«Mayin esar shabboda», «Ko‘zlari bejo», «Esim ko‘p» kabi qo‘shiqlar tinglovchilar orasida keng tarqalib, ijodkorning yangi auditoriyasini shakllantirishga xizmat qildi.
2025 yil: Markaziy Osiyoga olib chiqqan «Mast aylading»
2025 yilda Ulug‘bek Yo‘lchiyev yanada faol ijod qildi. U o‘zbek va qoraqalpoq musiqa an’analarini uyg‘unlashtirgan qator asarlarni taqdim etdi.
«Suygenim Salam», «Mast aylading», «Muattar», «Onajon», «Sen eng zo‘ri», «Gulandon», «Ana», «Yurak ko‘tarmaydi-da» kabi qo‘shiqlar ijodkor repertuaridan joy oldi.
Ular orasida «Mast aylading» alohida ajralib turdi. Qo‘shiq Ulug‘bek Yo‘lchiyev ijodini O‘zbekistondan tashqarida ham kengroq auditoriyaga olib chiqib, uning Markaziy Osiyo mamlakatlaridagi tanilishiga xizmat qildi.
Bu bosqich Ulug‘bekning ijodida yangi tendensiyani — turli tillar, madaniyatlar va musiqiy uslublarni birlashtirish orqali keng mintaqaviy auditoriyaga chiqish strategiyasini ko‘rsatdi.
2026 yil: yangi xitlar va yangi hamkorliklar
2026 yilda Ulug‘bek Yo‘lchiyev yangi qo‘shiqlar ustida faol ishlashni davom ettirmoqda.
Ijodkorning «Axahey», «Telbadey», «Zaharda», «Ibi-ibi», «Janime» kabi yangi taronalari tinglovchilarga taqdim etildi.
Yilning e’tiborga molik ijodiy loyihalaridan biri esa «Uxlamaysizmi» ko‘rsatuvida Ulug‘bek Qodirov bilan birgalikda ijro etilgan «Do‘st ekan» qo‘shig‘i bo‘ldi.
O‘zbek va qoraqalpoq tillarida ijro etilgan mazkur qo‘shiq ikki ijodkorning hamkorligi sifatida katta qiziqish uyg‘otdi. Qo‘shiq uchun videoklip ham muxlislar tomonidan kutilmoqda.
Shaxsiy hayot va ijod
Ulug‘bek Yo‘lchiyev 2019 yilda oila qurgan. Bugungi kunda u Maryam va Muhammadyasin ismli farzandlarning otasi.
Ijodkorning qo‘shiqlarida ota-ona, oila, muhabbat, ayriliq, sog‘inch va insoniy munosabatlar kabi mavzular tez-tez uchrashi ham bejiz emas. Uning repertuaridagi ko‘plab asarlar shaxsiy kechinmalar va hayotiy kuzatuvlar bilan uyg‘unlashadi.
Bugungi Ulug‘bek Yo‘lchiyev
Ulug‘bek Yo‘lchiyevning ijodiy yo‘li oddiy estrada faoliyatidan ko‘ra kengroq tarixga ega. U avval shoir sifatida shakllandi, keyin bastakorlikni o‘zlashtirdi, «Shohzamon» nomi bilan xonanda sifatida o‘zini sinadi, muvaffaqiyatsizliklar va tanaffuslarni boshdan kechirdi hamda nihoyat o‘z nomi bilan yangi bosqichga chiqdi.
Bugun u o‘zbek va qoraqalpoq musiqiy muhitini birlashtirayotgan, zamonaviy estrada bilan milliy ohanglarni uyg‘unlashtirayotgan ijodkorlardan biri sifatida faoliyatini davom ettirmoqda.
Ulug‘bek Yo‘lchiyev uchun ijod — shunchaki qo‘shiq yaratish emas. Bu uning hayotiy tajribasi, oilaga bo‘lgan munosabati, sog‘inchi, quvonchi va insoniy kechinmalarini tinglovchiga yetkazish vositasidir.
«Shohzamon» davri Ulug‘bekka sahnani tanitgan bo‘lsa, Ulug‘bek Yo‘lchiyev nomi ostidagi yangi davr unga o‘z ijodiy qiyofasini to‘liq namoyon etish imkonini bermoqda.
Endilikda uning oldidagi asosiy maqsad — nafaqat O‘zbekiston, balki butun Markaziy Osiyo musiqa bozorida o‘z o‘rnini yanada mustahkamlash va o‘zbek musiqasini yangi auditoriyalarga olib chiqishdir.
Ulug‘bek Yo‘lchiyev — kecha «Shohzamon» sifatida tanilgan, bugun esa o‘z nomi bilan yangi musiqiy tarixini yozayotgan ijodkor.
Hafta oxiridan O‘zbekistonga salqin havo oqimi kirib keladi
Cobalt’ning O‘zbekistondagi sotuvlari 2 baravargacha tushib ketdi
Jizzaxda bir sutkada 2 ta YTHda 5 kishi halok bo‘ldi
