Ukraina urushi: O‘lgan deb o‘ylangan avstraliyalik fuqaro hozir tirik ekanligi ma’lum qilindi

Avstraliya ma’muriyatining xabar berishicha, Rossiya tomonidan Oskar Jenkins ismli fuqaroning tirik ekanligi tasdiqlandi. Avstraliya Bosh vaziri Entoni Albanese, agar u asirga olinganidan so‘ng o‘ldirilgani haqidagi xabarlar to‘g‘ri chiqsa, og‘ir oqibatlar bo‘lishi haqida ogohlantirgan edi.

Avstraliya Tashqi ishlar vaziri Penni Vongning ma’lum qilishicha, Ukrainada jang qilayotgan va Rossiya kuchlari tomonidan asirga olinganidan so‘ng o‘ldirilgan deb taxmin qilingan Avstraliya fuqarosi hali ham tirik.

Dekabr oyida Oskar Jenkinsning rus askarlari tomonidan so‘roq qilinayotgani va kaltaklanayotgani ko‘rsatilgan videotasvirlar tarqaldi. Shundan so‘ng, shu oyning boshida u asirga olingach o‘ldirilgani haqida xabarlar paydo bo‘ldi.

Rossiya: Avstraliyalik "tirik va qo‘lga olingan"

"Avstraliya hukumati Rossiyadan Oskar Jenkinsning tirik va qo‘lga olingan holda ekanligini tasdiqlovchi ma’lumot oldi," dedi Vong o‘z bayonotida va qo‘shimcha qildi: "Biz hamon janob Jenkinsning harbiy asir sifatidagi ahvoli uchun jiddiy xavotirdamiz."

"Hukumat Rossiyani janob Jenkinsni ozod etishga chaqirmoqda," dedi Vong.

"Agar Rossiya janob Jenkinsga xalqaro gumanitar qonunchilik bo‘yicha unga tegishli bo‘lgan himoyani ta’minlamasa, bizning javobimiz qat’iy bo‘ladi," deya ta’kidladi u.

"Biz Kanberrada va Moskvada Rossiyaga janob Jenkins harbiy asir ekanligini va Rossiya unga xalqaro gumanitar qonunchilikka muvofiq, shu jumladan insoniy munosabatda bo‘lishi shartligini aniq yetkazdik."

Jenkinsning vafoti haqidagi xabarlar tasdiqlanmagan

Shu oyning boshida Vong Avstraliya hukumati Jenkinsning o‘ldirilgani haqidagi xabarni tasdiqlash ustida ishlayotganini ma’lum qilgan edi.

Jenkins rus kuchlari tomonidan o‘ldirilgan bo‘lishi mumkinligi haqida xabar tarqalgan paytda, Avstraliya Bosh vaziri Entoni Albanese uning hukumati "iloji boricha eng qat’iy choralarni ko‘rishi" haqida ogohlantirgan edi.

O‘shanda Moskva Avstraliya o‘z tashqi ishlar vazirligi bilan aniq masalani ko‘targanidan "xabarsiz" ekanini, biroq Ukraina bilan jang qilayotgan xorijliklar Rossiya qo‘shinlari uchun "qonuniy nishon" ekanligini aytgandi.