Ukraina Rossiya bilan muzokaralar juda muhim bo‘lishiga umid qilmoqda

Ukraina tashqi ishlar vaziri Andriy Sibiga Rossiya tomoni bilan Istanbulda “mohiyatli” uchrashuvlar o‘tkazish muhimligini ta’kidladi.

Bu haqda u Kiyevda fransiyalik hamkasbi Jan-Noel Barro bilan qo‘shma matbuot anjumanida ma’lum qildi.

"Bu uchrashuvlar mazmunli bo‘lishi juda muhim, toki boshqa tomon asosiy masalalarni muhokama qilish vakolatiga ega bo‘ladi: urushni tugatish, sulhga erishish. Biz buni hozircha ko‘rmayapmiz", - dedi u.

Vazir Ukraina tomonining takliflaridan biri AQSh prezidenti Donald Tramp, Yevropa davlatlari rahbarlari va Turkiya prezidenti Rajab Toyyib Erdo‘g‘on ishtirokida yetakchilar – Prezident Vladimir Zelenskiy va Rossiya yetakchisi Vladimir Putin darajasida uchrashuv o‘tkazish bo‘lganini eslatdi.

"Biz bunday rivojlanish sulhga erishishning keyingi dinamikasiga albatta ta’sir qilishiga ishonamiz", - deya qo‘shimcha qildi Sibiga.

Avvalroq, dushanba kuni Ukraina prezidenti Vladimir Zelenskiy Rossiya tomoni bilan 23 iyul kuni uchrashuv bo‘lib o‘tishini ma’lum qilgandi. Ammo keyinroq TASS manbasi uchrashuv 24 iyulda bo‘lib o‘tishi, delegasiyalar esa bir kun avval yetib borishi haqida xabar bergan edi.