Ukraina prezidenti devoni: "Xavfsizlik kafolatlari belgilanmaguncha Moskva bilan tinchlik masalasini muhokama qilishdan ma’no yo‘q"

Kiyev xavfsizlik kafolatlari belgilanmaguncha Moskva bilan tinchlik masalasini muhokama qilishdan ma’no ko‘rmaydi.

Bu haqda Ukraina prezidenti devoni rahbari o‘rinbosari Igor Jovkva "Rada" telekanali efirida ma’lum qildi.

"Xavfsizlik kafolatlarisiz, Ukraina hamda Yevropa va AQShdagi hamkorlarimiz Ukraina va butun Yevropa qit’asi uchun bu kafolatlar nima ekanligini aniq tushunmasdan turib, barqaror tinchlik o‘rnatish bo‘yicha muzokaralar jarayoni doirasida hamma gapirayotgan boshqa masalalar haqida gapirishdan ma’no yo‘q”, — dedi u.

Vladimir Zelenskiy idorasi rahbari o‘rinbosari, shuningdek, Kiyevga berilgan kafolatlar ham harbiy, ham siyosiy xarakterga ega bo‘lishi kerakligini, jumladan, Ukraina o‘z armiyasini hozirgi kuchi bilan saqlab qolishi va respublikaning Yevropa Ittifoqiga a’zoligini ta’kidladi.

Shu bilan birga, u Kiyev Yevropa davlatlari kontingentlarining mamlakat hududiga joylashtirilishini kutyaptimi yoki yo‘qligini aniqlamadi.