Tramp: "Agar menga qarshi suiqasd uyushtirilsa, Eronni "bombalash"ni buyurdim"

AQSh prezidenti Donald Tramp "agar Tehron uni o‘ldirishga muvaffaq bo‘lsa", Eronga misli ko‘rilmagan miqyosda zarbalar berishni buyurganini aytdi.

Tramp bu bayonotni The Post nashriga bergan intervyusida aytdi.

Amerika rahbari uzoq vaqtdan beri Eronning nishon ro‘yxatida birinchi o‘rinda turganiga ishonadi.

"Men ularning ro‘yxatida anchadan beri bo‘lganman. Biz aynan shu bilan shug‘ullanmoqdamiz. Men ko‘rsatmalar qoldirdim: agar biror narsa yuz bersa, ular ilgari hech qachon ko‘rmagan darajada bombardimon qilinadi", dedi Tramp.

Shu hafta Isroil AQSh prezidentiga qarshi yangi suiqasd rejasi haqida razvedka ma’lumotlarini olgani haqidagi xabarlarga izoh berar ekan, Tramp shunday dedi: "Yo‘q, yo‘q. Isroil hech narsa topmadi. Men uzoq vaqtdan beri Eronning zarbalar ro‘yxatida birinchi o‘rindaman. Bu hayot".

"Umid qilamanki, meni sog‘inasiz", deb qo‘shimcha qildi siyosatchi.