Tramp agar Eron tinchlik kelishuvi bo‘yicha yon bosmasa, uni "yo‘q qilish" bilan tahdid qildi

AQSh prezidenti Donald Tramp Fox News telekanali muhbiri bilan suhbatda Jared Kushner va Stiv Uitkoff Eron bo‘yicha muzokaralarni qayta tiklash uchun Islomobodga jo‘nab ketayotganini ma’lum qildi.

"Agar eronliklar kelishuvni imzolamasa, biz butun mamlakatni yo‘q qilamiz. Ularning elektr stansiyalari va ko‘priklari AQSh uchun qonuniy nishonga aylanadi", — deya ta’kidladi Tramp.

So‘ngra u aynan shu tahdidini Truth Social ijtimoiy tarmog‘idagi xabarida takrorladi.

"Biz Eronga o‘ta adolatli va oqilona kelishuv taklif qilyapmiz va umid qilamanki, ular buni qabul qilishadi. Agar qabul qilishmasa, Qo‘shma Shtatlar Erondagi har bir elektr stansiyasi va har bir ko‘prikni vayron qiladi. Boshqa “yaxshi yigit” bo‘lish yo‘q! Ular tezda yon bosishadi, osonlikcha yon bosishadi, agar kelishuvni qabul qilishmasa, qilinishi shart bo‘lgan, so‘nggi 47 yil davomida boshqa prezidentlar tomonidan Eronga nisbatan qilinishi kerak bo‘lgan ishni qilish men uchun sharaf bo‘ladi", — deb yozdi Oq uy rahbari.

Shuningdek, u Eronni Ho‘rmuz bo‘g‘ozi bo‘yicha kelishuvlarni buzishda aybladi.

"Eron kecha Ho‘rmuz bo‘g‘ozida o‘t ochishga qaror qildi, bu bizning o‘t ochishni to‘xtatish haqidagi kelishuvimizni butunlay buzishdir! Zarbalarning aksariyati Fransiya kemasi va Buyuk Britaniyaning yuk kemasiga qaratilgan edi. Bu unchalik yaxshi ish bo‘lmadi, shunday emasmi?", — deya qayd etdi Tramp.