Shimoliy Koreya Janubiy Koreyaning harbiy mashg‘ulotlari paytida 10 ga yaqin raketalarni uchirdi

Janubiy Koreya armiyasi chegarada o‘tkazayotgan mashg‘ulotlar vaqtida KXDR bir nechta raketa tizimlaridan 10 ga yaqin raketani uchirdi.

Bu haqda Janubiy Koreya shtab boshliqlari birlashgan qo‘mitasi ma’lumotlariga tayanib, Newsis agentligi xabar berdi.

"Harbiylarimiz Pxenyanning Sunan tumani yaqinidan shimoli-g‘arbiy yo‘nalishda taxminan soat 10:00 da uchirilgan 10 ga yaqin MLRS snaryadlarini qayd etdi", — dedi Birlashgan shtab boshliqlari.

Agentlikning qayd etishicha, 18 va 19 iyun kunlari Janubiy Koreya armiyasi chegara hududida artilleriya mashg‘ulotlarini o‘tkazgan. Janubiy Koreya harbiylari uchirishga tayyorgarlik belgilarini oldindan aniqlaganliklarini bildirmoqda. Taxminlarga ko‘ra, bu 240 mmlik raketa artilleriya qurilmalari bo‘lishi mumkin.

Koreya Respublikasi harbiylari yarim orolning markaziy qismidagi Xvachxon okrugidagi o‘quv mashg‘ulotlariga o‘ziyurar artilleriya bo‘linmalarini jalb qildi. Bu 4 iyun kuni o‘z lavozimiga kirishgan prezident Li Chje Myon davrida chegara mintaqasida o‘tkazilayotgan birinchi shunday mashg‘ulot edi. Li avvalroq Koreya yarimorolidagi keskinlikni kamaytirish va’dasiga muvofiq chegaradagi ovoz kuchaytirgichlarni o‘chirishni buyurgan edi.

18 iyun kuni Koreya Respublikasi, AQSh va ularning yaponiyalik hamkasblari harbiy-havo kuchlari Janubiy Koreyaning Chedjudo oroli janubida xalqaro suvlarda uch tomonlama mashg‘ulotlar o‘tkazdi.