Rossiyani chetlab o‘tishmoqda: Xitoy va Qozog‘iston Yevropaga temir yo‘l qurdi

Qozog‘iston va Xitoy Rossiyani chetlab o‘tuvchi, Yevropaga yuk tashishga mo‘ljallangan yangi temir yo‘l yo‘nalishini ishga tushirmoqda. Bu haqda seshanba kuni Qozog‘iston temir yo‘llari matbuot xizmati ma’lum qildi.

Xitoyning China Railway Container Transport kompaniyasi bilan hamkorlikda amalga oshirilayotgan loyiha doirasida Xitoydan jo‘natilgan konteyner poyezdlari Turkmaniston, Qozog‘iston, Eron va Turkiya hududlari orqali o‘tib, so‘ng Yevropa mamlakatlariga yo‘l oladi.

Yangi yo‘nalish bo‘yicha birinchi poyezd Xitoyning Chengdu shahridan Polshaning Lodz shahriga jo‘nab ketdi. "Bu yo‘nalish yuklarni uzluksiz yetkazib berish va mamlakatlar o‘rtasida samarali aloqani ta’minlaydi. Yo‘lda ketadigan vaqt taxminan 40 kun bo‘lishi kutilmoqda," - deya ta’kidlandi Qozog‘iston temir yo‘llari matbuot xizmati xabarida.

The Moscow Times nashrining yozishicha, Xitoy bir vaqtning o‘zida Rossiyani chetlab o‘tuvchi, Markaziy Osiyo davlatlari orqali o‘tadigan yana ikkita temir yo‘l loyihasini rivojlantirmoqda.

Birinchisi - Transkaspiy xalqaro transport yo‘nalishi 2023 yilning yozida kelishilgan bo‘lib, u Qozog‘iston, Kaspiy dengizi akvatoriyasi, Ozarbayjon va Gruziya orqali o‘tadi.

Ikkinchisi Qirg‘iziston va O‘zbekiston orqali Kaspiy dengizigacha temir yo‘l qurishni nazarda tutadi, u yerdan Turkiya orqali yuklar Yevropa Ittifoqiga yetkaziladi. Shuningdek, Fors ko‘rfazi mamlakatlari temir yo‘llari bilan bog‘lash rejalashtirilgan 8 milliard dollarlik loyiha 2024 yil iyun oyida tasdiqlangan bo‘lib, uni Xitoyning China Railway International kompaniyasi amalga oshiradi.

Ilgari Xitoydan Yevropaga yuklar Qozog‘iston, Rossiya va Belarus orqali temir yo‘l orqali olib o‘tilardi. Biroq, Ukrainada urush boshlanganidan beri ba’zi kompaniyalar Rossiya hududidan tranzit uchun foydalanishni to‘xtatdi, deb ta’kidladi Vashingtondagi Jamestown Foundation tahlil markazi.