Rossiyada yirik AYOQSh tarmog‘i bankrot deb topilishi mumkin

Rossiyaning «Rossiya» banki avtozapravka shoxobchalari tarmog‘i operatori «EvroTrans»ni bankrot deb topish to‘g‘risida arbitraj sudiga murojaat qilish niyatida. Bu haqda tegishli xabar «Fedresurs» reestrida e’lon qilingan. Hujjatda bank kreditor, «EvroTrans» esa qarzdor sifatida ko‘rsatilgan.

23 iyul holatiga ko‘ra, kompaniya umumiy qiymati 169 million rubl bo‘lgan to‘rtta obligasiya chiqarilishi bo‘yicha kupon to‘lovlarini amalga oshirmagan. Hozirda «EvroTrans»ning yettita obligasiya chiqarilishi muomalada bo‘lib, moliyaviy majburiyatlarni bajarishdagi muammolar aprel oyi oxirida boshlangan. O‘shanda kompaniya 600 million rubllik raqamli moliyaviy aktivlar bo‘yicha to‘lovni ikki kun kechiktirgan edi.

Bir necha texnik defoltlardan keyin «Ekspert RA», NKR va NRA reyting agentliklari kompaniyaning kredit reytingini pasaytirib, keyinchalik uni butunlay bekor qildi. Hozirgi vaqtda emitentning amal qiluvchi kredit reytingi mavjud emas.

Bankning bankrotlik haqidagi rejasi ma’lum bo‘lganidan so‘ng Moskva birjasida «EvroTrans» aksiyalari 15,5 foizga arzonlab, bir donasi 37 rublga tushdi. 2026 yil boshidan buyon kompaniya aksiyalari qiymati 70 foizdan ortiq pasaygan.

Kompaniya obligasiyalari ham keskin qadrsizlandi. Chiqarilish turiga qarab ularning narxi 13,45 foizdan 29,85 foizgacha tushgan. Eng katta pasayish 2027 yil mart oyida qoplanishi rejalashtirilgan BO-001R-07 obligasiyalarida qayd etildi.

Bozor ishtirokchilari ta’kidlashicha, Rossiyada yoqilg‘i chakana savdosidagi vaziyat ham yomonlashmoqda. Ularning hisob-kitoblariga ko‘ra, iyul oyida benzin savdosi mustaqil AYOQSh tarmoqlari va yirik neft kompaniyalari uchun ham zarar keltira boshlagan. Ayniqsa, AI-92 benzini bo‘yicha ekspluatasiya xarajatlari hisobga olinganda marjinal daromad manfiy ko‘rsatkichga tushgan.

Bloomberg ma’lumotlariga ko‘ra, so‘nggi uch oy ichida Ukraina harbiylari Rossiya neftni qayta ishlash zavodlariga qariyb 50 marta hujum uyushtirgan va yirik 34 ta zavodning kamida 24 tasiga zarar yetkazgan. Shu sharoitda iyun oyida Rossiyada neftni qayta ishlash hajmi so‘nggi 21 yildagi eng past darajaga tushgan. Natijada benzin va dizel yoqilg‘isi taqchil mahsulotga aylangan, narxlar esa o‘sishda davom etmoqda.