Rossiyada odam ovi: o‘g‘irlanganlar zo‘rlab urushga yuborilyapti!

Rossiyaliklar o‘g‘irlanib, urushga borishga majburlanmoqda.

Rossiyaning Ivanovo viloyatida noma’lum shaxslar mahalliy aholini o‘g‘irlab, ularni shartnoma imzolashga va urushga borishga majbur qilmoqda, deya xabar bermoqda Rossiyaning muxolif ommaviy axborot vositalari.

Yo‘qolganlarning qarindoshlari jurnalistlarga erkaklar ichkilikbozlik qilgani, tasodifiy ishlar bilan kun ko‘rgani va sog‘ligi yaxshi bo‘lmagani haqida so‘zlab berishdi. Ularning yaqinlari fikricha, o‘g‘rilovchilar "notinch" qishloqdoshlarini ataylab izlashgan, bunday erkaklarning ro‘yxatini tuzishda esa mahalliy hokimiyat organlari yordam bergan.

Ivanovo viloyatidagi erkaklar yo‘qolgani haqida mahalliy aholi 2025 yil boshida ijtimoiy tarmoqlarda gapira boshladi. Odamlarning yo‘qolish holatlari bir-biriga o‘xshash: erkaklar qo‘shimcha ishlarga ketib, g‘oyib bo‘lishadi. Yoki noma’lum shaxslar kelib, ularni zo‘rlik bilan qayergadir olib ketishadi.

Qarindoshlarining aytishicha, o‘g‘irlangan shaxslarning ko‘pchiligi doimiy ish joyiga ega bo‘lmagan, tez-tez ichkilikbozlik qilishgan. Ba’zilarining hatto shaxsiy telefoni va bank xizmatlarini ulash mumkin bo‘lgan raqami ham yo‘q edi. Shu bilan birga, yo‘qolgan erkaklarning yaqinlari ta’kidlashicha, Mudofaa vazirligi bilan shartnoma imzolash paytida o‘g‘irlangan shaxslar uchun qandaydir yo‘l bilan bankda hisob raqamlari ochilgan.

Qarindoshlar xizmat uchun to‘lovlar yo‘qolgan erkaklarning hisobida qolayotgani yoki o‘g‘rilar tomonidan o‘zlashtirilayotganini aniqlay olishmadi. Shuningdek, o‘tgan yilning oktyabr oyida tanlov punkti xodimlari tomonidan firibgarlik sodir etilgani ilk bor ma’lum bo‘ldi: qo‘shni Vladimir viloyatida polisiya shartnoma imzolagan ko‘ngillilardan pul o‘g‘irlagan uch kishini qo‘lga oldi. Firibgarlar harbiylarning SIM-kartalarini olib qo‘yib, ularning ish haqi hisob raqamlariga kirishgan va keyinchalik mablag‘larni yechib olishgan.