Rossiya nefti ham quladi

Bloomberg xabar berishicha, Rossiyaning Urals markali nefti narxi bir barrel uchun 52,76 dollargacha pasaydi.

U oxirgi marta 2023 yil iyun oyida 50 dollardan pastga tushgan edi.

Mart oyida Rossiya Moliya vazirligi 2025 yilda Uralsning o‘rtacha narxi byudjetda rejalashtirilgan 70 dollar o‘rniga bir barrel uchun 60 dollarga yaqin bo‘lishini kutayotganini ma’lum qilgandi. Vazirlik bashoratiga ko‘ra, bunday vaziyatda byudjet taqchilligi oshadi, ammo yalpi ichki mahsulotning 1 foizidan oshmaydi. Shunday qilib, neft narxi allaqachon kutilganidan 7,24 dollarga arzonlashdi.

Urals narxi jahon kotirovkalari izidan pasaymoqda. 7 aprel kuni savdolarda Brent nefti deyarli to‘rt yil ichida birinchi marta bir barrel uchun 63 dollardan pastga tushdi.

RBK xabar qilishicha, neft narxi o‘tgan haftadan beri AQShning savdo bojlari va Xitoyning javob choralari joriy etilishi, shuningdek, OPEK+ning kutilmaganda qazib olish hajmini ilgari taxmin qilinganidan ko‘proq oshirish to‘g‘risidagi qarori tufayli pasaymoqda.

Rossiya Prezidenti matbuot kotibi Dmitriy Peskov 7 aprel kuni Kremlning jahon iqtisodiyotidagi vaziyatni neft narxlarining pasayishi munosabati bilan diqqat bilan kuzatayotganini ma’lum qildi. U bu ko‘rsatkich "biz uchun juda muhim, byudjetimizni to‘ldirish uchun g‘oyat ahamiyatli" ekanligini ta’kidladi. Peskov vaziyatni "nihoyatda beqaror, keskin va hissiy jihatdan haddan tashqari zo‘riqqan" deya baholadi.