AQSh Rossiyaga "tinchlik uchun" soat qo‘ydi – muddat haftalarda hisoblanadi!

AQSh Rossiyaga tinchlik masalasini hal qilish uchun "haftalar" muhlat berdi.

AQSh Davlat kotibi Marko Rubio Vashington yaqin haftalar ichida - oylar emas - Rossiyaning Ukrainadagi urushni to‘xtatishga tayyorligini aniqlab olishini ma’lum qildi.

"Prezidentning maqsadi quyidagicha. U urushni tugatmoqchi va buni o‘z ma’muriyati davrida iloji boricha tezroq amalga oshirmoqchi. Agar ikkala tomon ham rozi bo‘lsa, bu urushni har ikki tomon uchun ham maqbul shartlar asosida yakunlash mumkin. Hozirda biz ana shu shartlarni izlash jarayonidamiz va tez orada - oylar emas, haftalar ichida - Rossiyaning tinchlikka tayyorligini bilib olamiz," - dedi u.

Rubioning aytishicha, Ukraina allaqachon o‘t ochishni to‘xtatish va muzokaralarga tayyorligini ko‘rsatgan. Endi qaror Rossiya va uning rahbariyati qo‘lida. U, shuningdek, Ukrainada o‘t ochishni to‘xtatish rejimi bir necha bor buzilganini ham qo‘shimcha qildi.

Davlat kotibi, bundan tashqari, AQSh "tinchlikni rivojlantirish" ustida ishlayotganini ma’lum qildi. U ogohlantirdiki, agar Rossiya tinchlik jarayonini cho‘zadigan bo‘lsa, AQSh prezidenti Donald Tramp Moskva bilan muzokaralar olib borishni to‘xtatadi.

"U (Tramp - tahr.) urushni tugatishni va buni o‘z ma’muriyati davrining dastlabki bosqichida amalga oshirishni xohlaydi. Agar tinchlik imkoniyati bo‘lsa, biz buni bilib olamiz. Agar hech kim tinchlikdan manfaatdor bo‘lmasa, buni ham bilamiz va shunga qarab qaror qabul qilamiz. Ba’zi yaxshi va yomon belgilar bor, hech kim oson bo‘lishini aytmagan," - dedi Rubio.