Rossiya Federasiyasi Davlat Dumasi mehnat muhojirlari uchun qo‘shimcha talablar kiritishni taklif qildi

Davlat Dumasi deputatlari mehnat muhojirlari uchun qo‘shimcha tibbiy talablar to‘g‘risidagi qonun loyihasini tayyorladi.

Bu haqda Mehnat qo‘mitasi raisi Yaroslav Nilov ma’lum qildi.

Loyihada chet el fuqarolarini Rossiya Federasiyasiga kirishda tibbiy sug‘urta, immunitet tanqisligi virusi, gepatit B/S, sifilis va sil kasalliklari (10 kun davomida amal qiladi) va giyohvand moddalarning yo‘qligi (yaroqlilik muddati 72 soat) bo‘yicha testlarni taqdim etish majburiyatini yuklash taklif etiladi.

"Migrantlar kadrlar taqchilligini to‘ldirishi kerak, qo‘shimcha tibbiy qiyinchiliklar tug‘dirmasligi kerak", dedi Nilov.

Tashabbus mualliflarining fikricha, bu sog‘liqni saqlash tizimi yukini kamaytiradi. Hozirda kirish uchun faqat tibbiy sug‘urta talab qilinadi. 2024 yilda Rossiya Federasiyasida 8 millionga yaqin xorijiy mehnat muhojiri ishlagan.