Ronaldu jamoasi bir kishi kam o‘ynagan holda Benzema jamoasini yengdi va Saudiya Superkubogi finaliga chiqdi

Gongkongda Saudiya Arabistoni Superkubogi yarim finali doirasidagi "An-Nasr" - "Al-Ittihod" uchrashuvi bo‘lib o‘tdi. Bahsda riyodliklar 2:1 hisobida g‘alaba qozondi.

O‘yinda 10-daqiqada Sadio Mane hisobni ochdi. 16-daqiqada Stiven Bergveyn muvozanatni tikladi. 25-daqiqada senegallik yulduz jiddaliklar darvozaboni qornini bosgani uchun maydondan chetlatildi.

Ikkinchi bo‘limning 61-daqiqasida Krishtianu Ronaldu darvozabon bilan birga-bir holatiga chiqib bordi va yonida turgan Joau Feliksga to‘pni uzatdi, portugaliyalik yulduz bo‘sh darvozani ishg‘ol qilib, riyodliklarga final yo‘llanmasini keltirgan gol muallifi bo‘ldi.

Ertaga ikkinchi yarim finalda "Al-Ahli" "Al-Qodisiya" bilan to‘qnash keladi.