Qizil kitobga kiritilgan hayvon va o‘simliklardan foydalanishni cheklovchi talablar belgilanadi

Yurtimizdagi noyob hayvon va o‘simliklar turlarini asrab-avaylash va ko‘paytirish atrof-tabiiy muhit barqarorligini ta’minlashga xizmat qiladi. Yangi tahrirdagi O‘zbekiston Respublikasi Konstitusiyasida ekologik masalalar, xususan, atrof-muhitni asrash, o‘simlik va hayvonot dunyosini muhofaza qilishga doir bir qator normalar o‘z aksini topgan. Ushbu normalar asosida qonun hujjatlarini takomillashtirish muhim masala hisoblanadi.

Qonunchilik palatasining Ekologiya va atrof-muhitni muhofaza qilish masalalari qo‘mitasining yig‘ilishida O‘zbekiston Respublikasining Qizil kitobiga kiritilgan kamyob va yo‘qolib ketish xavfi ostida turgan o‘simlik va hayvonot turlarini muhofaza qilishni yanada kuchaytirishga qaratilgan qonun loyihasi ko‘rib chiqildi.

Qonun loyihasi bilan “O‘simlik dunyosini muhofaza qilish va undan foydalanish to‘g‘risida”gi, “Hayvonot dunyosini muhofaza qilish va undan foydalanish to‘g‘risida”gi, “Ov qilish va ovchilik xo‘jaligi to‘g‘risida”gi qonunlarga o‘zgartirish va qo‘shimchalar kiritilmoqda. Ular orqali kamyob va yo‘qolib ketish xavfi ostida turgan, O‘zbekiston Respublikasi Qizil kitobiga kiritilgan yovvoyi hayvon va o‘simliklar turlaridan foydalanishni taqiqlovchi va cheklovchi talablarni belgilash nazarda tutilmoqda.