Qandli ichimliklar har yili 1,2 million yurak xastaligi va 300 ming o‘limga sabab bo‘ladi - tadqiqot

Tafts universiteti (AQSh) olimlari tomonidan olib borilgan xalqaro tadqiqotga ko‘ra, shakarli ichimliklar har yili dunyo bo‘ylab 300 000 dan ortiq kishining o‘limiga sabab bo‘ladi. Ular orasida 2-toifa qandli diabetdan 80 mingga yaqin va yurak-qon tomir kasalliklaridan 258 ming kishi vafot etgan.

118 mamlakatdagi 2,9 million kishining parhez ma’lumotlariga asoslangan tadqiqot shuni ko‘rsatdiki, gazlangan ichimliklar, energetik ichimliklar va mevali ichimliklar har yili 1,2 million yangi yurak xastaligi va 2,2 million 2-toifa diabet kasalligiga olib keladi. Olimlarning ta’kidlashicha, bu ichimliklarni haddan tashqari iste’mol qilish ham qondagi qand miqdori, insulin qarshiligi va vazn muammolariga olib keladi.

Ayniqsa, shakarli ichimliklar faol reklama qilinadigan rivojlanayotgan mamlakatlarda vaziyat keskin. Kolumbiyada diabetning yangi holatlarining deyarli yarmi ularni iste’mol qilish bilan bog‘liq, Meksikada - uchdan bir qismi, Janubiy Afrikada diabetning 28 foizi va yurak-qon tomir kasalliklarining 15 foizi ham ushbu mahsulotlarni ortiqcha iste’mol qilish bilan bog‘liq.

Tadqiqot mualliflarining ta’kidlashicha, aholining shakarli ichimliklar xavfi haqida xabardorligi o‘sib bormoqda, lekin juda sekin. Olimlarning fikriga ko‘ra, ushbu ichimliklar, ayniqsa, kam daromadli va sog‘liqni saqlash tizimi yomon bo‘lgan mamlakatlarda marketingi va mavjudligini cheklash choralari zarur.